San Pra ai Rita a lam (02 July 2019)

San Pra ai Rita a lam

          Nawku Hpung a labau lam hpe hkap madat la na ten bai du wa magang nga sai hte rau, daini na lamang hta Ya ten Singapore kaw magam bungli galaw shakut nga ai Julia Labang Tawm Num hpyi shawn da ai, “San Pra Ai Rita A Labau Lam” hte seng nna, mu hti hkaja lu ai made mi gam garan ya na matu lajang da n ngai.

          Nu wa hpu nau ni, San Pra ai Rita gaw, Cascia ngu ai mare hta, madu a shaning (1381) ning hta, shangai dai daw wa sai lam chye lu ai. Kaji ten hta, Kanu yen kawa hte rau sha nga let, mungkan a laili laika hpaji ni hpe sharin hkam la lu sai lam chye lu ai. Shingrai, Sak prat ram wa sai hte rau, num wa na matu, lajang ya manu ai. Lahkawng maga na kanu kawa ni myit hkrum let, Rita hpe mayaw htinggaw de ya sai. Raitim, San Pra ai Rita a dinghku prat gaw, matsan shayen rai nga ai. Hpa majaw nga jang, shi a madu wa gaw, grai nhkru nkaja ai hte, shi hpe zingri zingrat rai, dang sha nga nu ai. Raitimung, San Pra ai Rita gaw, matai htang ai lam n nga, grai sumnung shingdi ai hte shi hte seng ai magam bungli ni, dinghku amu ni hpe atsawm sha galaw nga nu ai. San Pra ai Rita gaw, Madu Yesu hpe grai tsawra ai re majaw, shi a yak hkak jam jau ai lam ma hkra hpe Madu Yesu kaw sha ap nawng rai, rau ai ten shagu akyu hpyi shakut nga nu ai. Bai nna, shi a madu wa a man hta, kasi kaja madun ai hte, Madu wa gade mi pawt daru, zingri ai raitim, mani sumsai myi man hte tsun shaga nga nu ai. Shi a kun dinghku, simsa ai hte nga pyaw na matu sha akyu hpyi nga nu ai. San Pra ai Rita a madu wa gaw, kun dinghku hta mung, mala la nhkru nkaja sha n ga, makau grup yin htingbu hting byen ni a ntsa e mung grai n kaja ai majaw, masha ni shi hpe masin pawt nna, sat kau sai rai nga ai.

          San Pra ai Rita gaw,  madu wa garai nsi shi yang, myit yawn myit malai let si wa na matu, mara raw lu hkra shadum jahprang let, hpang jahtum mara raw Sakramentu hpe hkam la lu sai lam kabu hpa rai nga sai. Shingrai, San Pra ai Rita a madu wa gaw, Chyoi pra ai hku si wa sai rai nga ai. Shan  gaw shadang sha (2) hpe shangai shaprat da ma ai, Dai shadang sha yen gaw, ya na zawn kawa hpe masha ni sat kau ya ai re hpe myit hta matsing da nna, matai htang na myit nga masai. Dai majaw, shan nau lahkawng, kawa a lup de sa nna, lup ntsa kaw sa dagam da ai ma ai. Daizawn dagam da ai lam, Kanu Rita chye kau ai re majaw, grai yawn ai hte myit ru nga nu ai. Shingrai, Kanu gaw, “Nye a kasha yen, masha ni hpe matai dawp na lam nbyin u ga, ndai matai dawp ai lam gaw Karai Kasang hte she seng ai re majaw, ya na zawn matai dawp masha sat ai mara kaba galaw na malai, shan nau lahkawng si mat ai gaw grau kaja na re, nga nna myit let, Madu Karai hpang de akyu ja ja hpyi nga sai.”  San Pra ai Rita a akyu hpyi nsen hpe Madu Karai Kasang madat ya ai re majaw, dai shaning hta sha, shannau lahkawng machyi kaba hkrum nna, myit malai let, masha ni hpe mara raw dat ya lu ai hte, shannau hkawng yen si mat sai rai nga ai.

          Laklai ai langai gaw, Kanu Rita akyu hpyi ya ai a majaw, shannau a kawa hpe sat kau ya ai ni hpe mara raw hkyamsa jaw ya ai lam rai nga ai. Nu wa hpu nau ni, akyu hpyi ai chyeju kade ram kaba la ai gaw mau hpa rai nga ai. Ya daini na ten anhte nang ngai marai langai ngai, ndai zawn re ai mabyin hte hkrum sha taw ai ngu ga, loi loi hte mara raw ya lu na grai yak na re. Matai htang mayu ai she law na ga ai. San Pra ai Rita a shagrit shanem let, hkam sharang lu ai n gun atsam gaw, grai nan kasi la hpa rai nga mali ai re. Ya na zawn mara raw dat hkyamsa jaw lu na matu mung, Karai Kasang a chyeju nlawm jang gara hku ma nmai byin na re. San Pra ai Rita gaw, shi a Madu wa hpe mung, wenyi lam hta hkye la lu sai sha n ga, shi a kasha yen hpe mung, hkye la lu sai re majaw, yawnhkyen hkrum ai raitim, myit pyaw nga nu ai. Ndai zawn mabyin ni hkrum ngut ai hpang, San Pra ai Rita gaw, Mama tai mayu ai raitimung, gaida jan re majaw, Cascia mare na Augustinian Mama uhpung ni, nhkap la hkraw ma ai. Lana mi na aten hta, chying hka la da ai gawk hpe, Mama ni sa hpaw yu ai shaloi, dai gawk kata hta, Rita rawng nga ai hpe wa mu masai. Dai shaloi, ndai mabyin gaw Karai Kasang lajang ai lak san chyeju re hpe Mama ni chye na hkam sha lu ai majaw, Rita hpe dai Mama hpung ni hkap la masai lam Nawku hpung a labau hta matsing da ai hpe chye lu ai.

          Nu wa hpu nau ni, San Pra ai Rita gaw, shaning (40)  ning du hkra dai jawng kaw nga nna, Madu Yesu a nni nkri lam hpe myit aru yu let, sharawng awng ai myit hte Wudang hpai ai lam hkan nga ai. Shingrai, shi a prat tup hta kyindut lam amyu myu hkam sharang sai majaw, Madu Yesu a ju janmau zawn, ju nma hkang hpe hkam la lu sai rai nga ai. Dai Madu Yesu a ju nma hkang gaw, San Pra ai Rita a kahtan e nan dan pru dan sai lam labau shang rai nga ai. Ya na zawn Madu Yesu a ju janmau nma hpe hkam la lu sai Rita gaw, lani hte lani, Madu Yesu hte grau grau nyi htep wa nga sai. Shi a prat hta, ru yak jam jau, zingri zingrat gade ram hkrum sha mat wa sai raitim, dai lam ni yawng hpe Madu Karai Wa kaw ap nawng kau sai re majaw, myit pyaw lam hpe sha lu la nga sai lam shi a labau hta mu hti lu nga mali ai re. San Pra ai Rita gaw, gaida rai tim, shi a ngam nga ai sak prat hpe mama prat hte ap nawng nga ai ten, Madu a shaning (1447) ning hta Madu kaw yup pyaw ban sa mat wa sai rai nga ai. Nu wa ni, Chyoi Pra ai Kahtawlik Nawku Hpung kawn nna, San Pra ai Rita hpe, “ Nbyin mai ai lam hte seng nna, kam shamyet ai San Pra masha, (Patroness of Impossible Cases) ngu nna shagrau let kam shamyet nga ga ai re. Shingrai, San Pra ai Rita gaw, madat mara ai tara hte hpu nau tsawra myit tara hte seng nna, kasi kaja dik langai mi mung rai nga ai. Dai majaw, anhte nang ngai yawng mung, San Pra ai Rita a kasi hpe la nna, madat mara ai lam, hpu nau shada tsawra matsan dum myit ni hte garum shingtau makawp maga hkat nga ga ngu, n gun jaw mayu n ngai. San Pra ai Rita a poi nhtoi hpe nawku hpung kawn, May Shata (22) ya shani ngu masat ya sai. Shingrai, dai shani hta lak lai ai akyu chyeju ni hpe hpyi la nga ga law.  

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.