San Pra ai Justina hte San Pra ai Cyprian a lam Daw 1 (11 June 2019)

San Pra Ai Justina hte Siprian a lam  daw 1

          Nawku hpung a labau lam hpe hkap madat la na ten bai du wa magang nga sai the rau, daini na lamang hta, San Pra ai Justina a labau lam hte seng nna, mu hti hka ja lu ai made mi gam garan ya na matu lajang da n ngai.

          Nu wa hpu nau ni, Justina ngu ai shayi sha gaw, San Jenaro ltaly mung hta e, shangai wa ai hpang kade n na yang 300 ning daram hta, Asia dan na Antiok ngu ai mare kaw, shangai dai daw wa sai rai nga ai. Shi a kanu yen kawa ni gaw tara maigan masha ni rai nga ma ai. Rai timung, Justina gaw asak 10 ning daram du jang, Nawku jawng kaw Jau langai mi tara hkaw ai lam hpe na ai majaw, Hkristian makam masham  Nawku hpung de shang wa sai rai nga ai. De a hpang, tsawra ai myit hte shi a kanu yan kawa hpe tara hkaw shadum ya ai. Karai kasang a garum chyeju hte awng dang nna, shi a nta masha ni yawng gaw Nat hpara sumla ni hpe kabai kau nhtawm me, teng man ai karai kasang hpang de kayin wa masai. Justina  gaw majoi mi karai kasang a mying ningsang hpe gang tsun kau ai Hkristian masha zawn nre ai sha, hpung tara hte seng ai wunli wungau yawng hte hte, hkum tsup lu hkra shakut shaja ai jan mung rai nga ai. Shingrai, Mungkan hte, mungkan ga na pyaw hpa lam ma hkra hpe  mung ndawng n yawt let, kau yen kau nna, Madu yesu hpe Nawku daw jau nga ai jan re lam Nawku hpung a labau hta matsing da nga mali ai.  Justina gaw, hkum hkrang gaw hten bya chye ai baw re ai hpe myit maju jung let, Nawku akyu hpyi ai lam hta ngang kang ai myit masin hte shakut nga nu ai. Dai majaw, shi a hkum hpe ding grin nyet kau ai hte, Lu sha gam nna,  shadawn sharam shagrit shanem let nga nga nu ai.

Ndai zawn mungkan ga a  ngwi pyaw lam hpe ndawng n yawn  nyet kau ai shayi sha gaw, ahpraw nsam gawng shing yan ntawm ai majaw nrai nga ai. Justina gaw gawng shingyan abawng alawng, ahpraw nsam tsawm la ai shayi sha rai nga ai. Dai zawn hpraw tsawm htap htuk la ai majaw, Adilik ngu ai grai lu su ai shabrang langai mi, shi hpe la na matu dagam daw dan sai. Dai shabrang wa gaw sut su hkik hkam ai wa re majaw, Ja, Lung seng ni hte tsawm dik ai kum hpaw kumhpa ni hpe shi hpe jaw nna, tsawra ai myit madun dan nhtawm me, gumlau(gunglau) chyam yu nu ai. Justina chyawm gaw,  ngai gaw Madu yesu hpe chyu sha prat tup san seng ai hte manoi nga na matu, nye a hkum hpe ap kau ni ai dai majaw, nye a masin salum hta gade tsawm, htap htuk sut su ai la hpe rai timung, ra marin sharawng ai lam n nga ai nga nna bai htan tsun dat nu ai. Dai ga na jang shabrang wa gaw ra marit ai myit grai naw rawng ai majaw, mandan, Jau ya, tsi mawan, maw hpaji hte hkyuk la na matu, myit tawn da sai. Shing rai, shi gaw grai mying dan hkung ai Siprian ngu ai lakle mandan sara wa hpang de sa  nna, Justina ngu ai mahkawn numsha langai mi hpe ngai grai ra, grai la mayu ai, Raitimung shi gaw ya du hkra kachyi mi pyi n hkraw nga ai. Shi hpe lakle mandan hte lu hkra, hkyuk ya rit. Ndai numsha hpe lu jang, nang sara kaba hpyi ai hte maren, ngai kum hpa jaw na nngai ngu nna, tsun dat sai. Shingrai, Siprian gaw dai lu su sahti shabrang ma hpe, nang hpa ntsang ra ai, Justina hpe gade n na yang lu la na re ngu nna ga sadi dat da sai.

Dai shaloi Siprian gaw Justina hpang de shi a lakle mandan hkyuk dat  nhtawm me, nhkru ai nat hpe mung dat dat nu ai. Dai nat gaw Justina hpang de sa du nna lam amyu myu hku lu hkra, gumlau na matu, shakut nga sai. Justina chyawm gaw, hkrum hkra wa na, hkrit hpa lam hpe mu lu ai majaw, tinang a hkum hpe n sim n sa lu sha gam let, yubak nyet kau nna, akyu hpyi ai lam hta nhkring n sa shakut nga nu ai. Agung alau hkrum shagu mung shi a hkum hpe Madu Yesu Wudang masat galaw ai. Shing rai nat a agung alau mahkam hta n hkrup u ga matu, dakring dalang shakut ai majaw, dai nat gaw shagu lang sum mat mat rai nu ai. Dai re ai majaw, lakle sara wa Siprian hpang de bai nhtang wa nhtawm me, dai nat gaw ndai Hkristian mahkawn numsha hpe ngai kaning di nna mung, nlu gumlau nngai, hpa majaw nga yang, shani shagu ngai hpe jaw jau nga ai masha law law wa hpe, ngai atsawm sha hkalem chye nngai, raitimung, ndai numsha gaw Wudang masat dinggrin galaw nna, ngai hpe hkap manga nga ai. Anhte dagam dala hkrum ai nat ni gaw Wudang masat galaw ai lam hpe grai hkrit gari ga ai. Dai majaw ndai zawn Wudang masat galaw ai ni kaw nna, hprawng makoi mat ra ga ai ngu nna tsun dat nu ai. Wudang masat a marang e nhkru ai nat gaw, dai numsha hpe sha pyi, ndang lu ai lam hpe na la jang, Siprian gaw grai mau mat sai.  Shingrai, Siprian gaw,  Wudang masat galaw ai lam ngu ai gaw, kade wa hpung shingkang rawng nga ai hpe myit yu nhtawm, ngai dai ni nteng n man ai nat hpe kabai kau  nna, teng man ai karai kasang hpe kam sham na ni ai ngu nna myit  hkut tawn da nu ai.

Dai re majaw, Siprian gaw shi a nkaja ai mandan lakle  amu hta na myit  malai lu nna, masum ya tup lusha gam, akyu hpyi nna hpang na laban shani e hpung masha ni hte rau Nawku daw jau lawm nu ai. Siprian Nawku jawng nhku de nnan shang wa ai shaloi, shawa masha ni grai mau mat ma ai. Nawku hpung masha ni chye da ai gaw, dai Siprian gaw, lakle sara kaba re ai hpe sha chye da ai majaw rai nga ai. Dai majaw, hpung mahsa ni, ndai wa hpa majaw, anhte a jawng kata de shang wa ai kun? nga nna, tinang kraw lawang e yawng gaw myit  aru yu shajang nga ma ai. Dai hta n ga, Siprian grai kam sham let, Nawku tawn a man e gum dagup nna, Wudang masat law law lang galaw ai lam  hpe masha ni bai mu jang, grau nna mau mahka mat ma ai. Nawku ngut jang, shi gaw Jau langai mi a lagaw nhpang e hputdi nna Wa e, ngai gaw mara kap ai wa rai nga nngai, ngai hpe matsan dum la nna, ndai teng man ai hpung hta jashawn la rit, ngu nna hpyi nem nu ai. Hpang shani, mare masha ni yawng a man e,Siprian gaw shi a mandan jau ya, maw hpaji hte seng ai laika ni, aga lak hpoi ni, ahkyu jak ni mahkra hte hpe, Wan hta nat sha_grawm kau nu ai. Dai hpang,shi lu malu hpe mung dut kau nna, matsan mayan ai ni hpe garan jaw kau sai rai nga ai. Dai aten kaw nna, Siprian gaw,  jahpawt shagu jau jau rawt nna, Karai Kasang a htingnu hpe ye seng kau ai hte, Nawku tawn na arai hpe kashin katsut kau, rai nga ai. shani tup tinang a pyaw lam ntam ai sha, matsan mayan hte machyi ai ni hpe gawan gatsan rai, nsim nsa Karai kasang hpang de akyu hpyi shaja nga sai lam gam garan  ya let, ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.