Shagrit Shanem Ai Myit Masin Gaw Hkristan Asak Prat a matu Ahkyak Dik Lam Rai Nna, Dai Myit Gaw Mungkan Ting Hpe Myit Simsa Lam Jaw Ya Nga Ai.

Hkristan asak hkrung lam hte seng nna jahtum ginchyum dat mungga ni hpe tsun lai  wa ai hta anhte gaw Karai Kasang a kashu kasha ni rai nga ai hpe galoi mung myit dum sumru la let shagrit shanem ai myit masin hte hkawm sa ra ai lam hpe tsun dan lai wa  ai.Shagrit shanem ai myit masin ngu ai gaw  ahkyak dik kaba ai lam ni hta na langai mi rai  nga ai . Dai shagrit shanem ai myit hte sha Nawku Hpung kata na masa lam ni hte Mungkan masa lam ni mahkra hpe simsa ai chyeju jaw ya lu nga ai lam hpe Wa Sarabyin Francis kawn tsun dan lai wa ai. San. Peter Shawa pa kaba hta lai wa sai bat masum ya shani e mung “shagrit shanem ai myit” ngu ai lam hpe tsun lai wa ai. Ndai shagrit shanem chye ai myit masin gaw tinang a kyang lailen mahkra hta na, hpang jahtum ngu na mung rai nga ai.

Shagrit shanem ai myit hte yawng hpe bai mai gaw gap la ai lam 

Si chye ai mara kaba hte machyi makaw byin shangun ai a, maga mi de(opposite) gaw “shagrit shanem ai lam rai nga ai. Gawngba ai myit hte myit ja ai myit gaw, anhte a sak hkrung lam hta kaba dik ai hku, n-gun rawng nna, ka-up da hkrum ai ngu shadu da tim, shagrit shanem ai myit hte hkawm sa ai rai yang she, anhte a prat hpe kaja wa  hkam kaja ai myit simsa ai chyeju ni hpe jaw ya lu na rai nga ai.

Myit ja, myit gawngban ai kaw na lawt kawt ai lam

Shakawn Kungdawn Laika (8:3-4) “ Na a sumsing lamu gaw, na a layung a amu, nang  tawn da ai shata hte shagan ni hpe ngai mada yu yang: Nang adum nga ai shinggyim masha  hte nang kawan yu nga ai masha gaw, hpa wa mi rai nga ai hka” nga nna tsun da ai chyum  mungga gaw, anhte ni gaw Karai Kasnag hpan lajang da ai mahkra hpe mada yu nna mung, Lamu de shagan ni hpring rai nga ai hpe mada let sumru yu nna mung, Karai Kasang a Hpung Shingkang hpe mu mada nna, tinang a gawngba ai myit masin, myit ja shangun ai lam ni kaw na, lawt kawt wa lu hkra mung, Karai Ksang gaw karum shingtau ya lu nga ai hpe dum shai ai myit rawng nga na matu  Wa Sarabyin tsun shadum lai wa sai.

Yesu gaw, shagrit shanem ai myit masin hte shi a sak hkrung hkawm sa ai lam hpe madun dan lai wa sai re. (Matt 5:3) “Wenyi hta mastsan mayan rai nga ai ni gaw, a lu ma ai; Kaning rai nme law sumsing lamu a mungdan gaw, shanghte a mungdan rai nga malu ai.” Shagrit Shanem ai a majaw, kraw kata hta tinang a myit kaji garen ai lam hpe hkam sha chye nga ai. Dai myit kaji garen ai lam, myit san seng ai lam, Shagrit shanem chye ai myit ngu ai hte anhte a sak hkrung lam hpe madung da, atsam dat hkawm sa wa ra ai.

Madu Yesu hte Kanu Maria a ailen hpe yu nna, sak hkrung hkawm sa nga ga 

Karai Kasang a myit ra sharawng ai hpe shagrit shanem ai myit masin hte hkap la lai wa sai Kanu Maria a sak hkrung hkawm sa lam hpe mada yu dat yang, kabu gara ai myit masin hte hkap la ai..Shi kana Elizabeth a ntsa e tatut tsawra myit hpe sa madun dan lai wa ai, Nu Maria gaw Madu Yesu a sape ni a ntsa hta rai timung, Wudang hkrun lam mabyin hta raitim shi a myit nden ja ai lam ni hpe mu mada lu nga ai. Kasha Karai Kasang hte Chyoi Pra Ai Wenyi Karai kasang hpe hkap la rai nna shagrit shanem ai myit masin hte sak hkrung hkawm sa dan lai wa sai lam hpe mu chye lu nga ai,” lam  Wa Sarabyin Francis kawn tsun sanglang dan lai wa sai.

Kanu Maria a kaja ai kyang lailen hte rau anhte a matu akyu hpyi htinglu htinglai ya ai a marang e - anhte a sak hkrung hkawm sa lam hta byin hkrum hkra wa na agung alau ni hpe dang manga kau lu na hte Madu Yesu madun dan lai mat wa sai shagrit shanem ai myit masin hte ngwi pyaw sima ai chyeju ni hte rau hkawm sa wa lu u ga.

Hpang jahtum hku nna Wa Sarabyin tsun ai gaw;- Madu Yesu hte Kanu Maria yan mung tatut galaw dan lai wa sai, shagrit shanem ai myit masin gaw anhte a hkye hkrang la ai lam hte kabu gara ai lam hpe lu la na matu kyet re ai lam rai nga ai..bai ndai Mungkan ga hte Nawku Hpung ni hpe simsa lam jaw ya ai zawn shagrit Shanem ai lam n nga ai shara gaw majan, myit nhkrum nra lam ni..dawhka ai lam ni hte sha rai nga na re ..nga nna e tsun Lai wa ai..

https://www.vaticannews.va/en/pope/news/2024-05/pope-at-audience-humility-essential-for-christian-life.html