Karai Kasang Hpe Tsawra Ai Gaw Kade Daram Wa Tsawm Htap Nga A Hka

Wa Sarabyin Francis kawn Lai wa sai Laban Shani na missa hta anhte hpung masha ni hpe anhte hta aten ni (limitation) nga tim anhte a prat hku, anhte a kabu hpa lam hku, Karai Kasang hpe tsawra ai gaw kade wa tsawm htap ai hpe sak se hkam na matu Madu Yesu anhte hpe n gun jaw taw nga ai, bai nna kabu gara shiga (Gospel) hpe hkaw tsun ai hta aten hpang hkrat ai ngu n nga ai hpe mung  aja awa tsun shadum lai wa ai.

San Peter shawa pa kaba hta du sa ai hpung masha ni hpe Karai Kasang gaw shi a kasa ni a ntsa myit galu ai hte maren anhte rau mung shi galoi mung nga nga ai, bai nna anhte Madu Yesu hpe tsawra ai gaw kade daram tsawm htap ai lam hpe anhte a prat hte anhte a kabu pyaw ai hku sak se hkam na matu shaga nga ai hpe dai shani na mungga hku tsun shadum lai wa ai. Dai shani hti ang ai Mark a kabu gara shiga hpe la kap nna Karai Kasang gaw “masha hpe hkwi ai masha tai na matu” shawng nnan na shi lata la ai Kasa ni a magam bungli hpe bai tsun lai wa ai. Anhte hpe Madu Yesu shawng nnan shi a prat hta shi a sasana magam hta shang lawm na matu masha ni hpe saw shaga lai wa ai, ndai hpe anhte ni myit sumru yang lak lai ai lam langai anhte mu lu nga ai, dai gaw “anhte ni shi hte rau masha hkye mawoi ai magam bungli hta shang lawm na hpe ra sharawng nga ai, bai nna shi hte rau galoi mung matut mahkai nga na hpe ra sharawng nga ai” hte “shi a magam bungli hta lit la nna woi awn na hpe ra sharawng”nga ai lam tsun lai wa ai.

Wa Sarabyin kawn anhte ni mau hpa ga shadawn hpe yu yu ga “shi kade daram shi a Kasa ni a ntsa hta myit galu lai wa ai: kalang lang shanhte ni shi tsun ai ga hpe n chye na ai, bai shada da n hkrum n ra ai lam ni nga lai wa ai, aten law law shi hkaw tsun ai lam, yaw shada ai lam ni hpe nchye hkap la lai wa ai, dai hta daw jau ai lam ni mung lawm ai”. Madu Yesu shanhte hta ndai zawn re ai lam ni kade nga ai rai tim shanhte hpe matut nna kam ai hte lata la lai wa ai lam tsun lai wa ai. “Masha yawng a matu Karai Kasang a hkye hkrang la ai lam hpe anhte a matu shi galaw ya ai gaw Madu Yesu shi a kabu pyaw dik htum ai hte sasana magam re ai lam” hpe Wa Sarabyin kawn tsun lai wa ai. Wa Sarabyin gaw anhte tsawra myit garan kachyan ai hta “anhte a hkum myit masin, anhte a tsun shaga ai ni hte shamu shamawt ai ni yawng shi hte rau rai ra na” lam hte “nhtoi hte kabu hpa lam gaw law la nga ai dai ni gaw anhte a makau hta sha nrai anhte a kata hta mung rawng ra nga ai lam tsun lai wa ai.

Anhte hpe Mungga hkaw tsun ai gaw “ aten hpe majoi jahtum ai lam nre” hpe aja wa n gun jaw tsun shadum ai gaw “ masha wa pyaw hkra garum ya ai marang e nang hta grau pyaw ai lam lu la na, manang wa hpe (free) wanglu wanglang byin hkra garum ya ai marang e nang hta grau nna wanglu wanglang   byin ai lam hkam la lu na bai nna manang wa hpe grau kaja hkra garum ya ai marang e nang hta grau kaja ai” lam ni hkam la lu na re hpe tsun lai wa ai.

Wa Sarabyin kawn ndai shara hta nga ai anhte marai hkum shagu hpe kabu gara shiga hkaw tsun na matu shaga la hkrum ai ni hkrai rai nga ai hpe madung da tsun shadum lai wa ai. “Tinang hkum tinang san yu ga” “Ngai.. Madu Yesu shaga ai hte sak se hkam na hpe chye na hkap la ai kawn, ngai hte nye makau hta Kabu gara ai lam galoi mung jat wa ai lam hpe myit dum na matu hkring taw nga ai kun? “ngai akyu hpyi ai ten hte Karai kasang gaw masha ni hpe myitpyaw lam jaw matu shaga la hkrum ai hpe chyeju dum nga ai kun? Nye a kabu gara ai hte sak se hkam ai marang e masha marai langai ngai hpe hkye la na matu ngai hta myit sharawng nga ai kun? Anhte ni Karai Kasang hpe tsawra ai gaw kade daram tsawm htap nga ai rai kun? Wa Sarabyin Francis kawn hpang jahtum hku nna “ Kanu Maria kawn Kabu gara shiga a kabu hpa nam chyim hpe lu la na matu garum ya nga u ga” ngu ai kyu hpyi ga hte shi a mungga hpe hpum dim da tsun lai wa ai hpe chye lu ai.