Kashin Kamun Hkam Ai A Marang E Karai Kasang A Kasha Tai Wa Ai

Wa Sarabyin Francis kawn lai wa sai laban shani na Missa Hkungga hta kam sham ai hpung masha ni hpe anthe gaw kashin kamun hkam la dat ai hte htani htana Karai Kasang a Kasha byin tai wa sai, dai chyeju hpe myit dum let anhte ni shakawn shagrau ai lam galaw ra nga ai hpe tsun lai wa ai. Anhte ni Kashin kamun hkam ai a marang e htani htana Karai Kasang a kasha ni tai lu sai, ndai lam gaw anhte ni galoi mung adum nga let chyeju dum shakawn shagrau ra ai lam mung rai nga ai.
Madu Yesu kashin kamu hkam ai poi nhtoi Shani na Missa hta San Peter’s shawa pa kaba kaw du sa nga ai kam sham ai hpung masha ni hpe aja wa shadum ga hte tsun saw shaga lai wa ai. Bai Madu Yesu hpe San Yawhan kawn kashin kamun jaw ai lam hte dai Shani na hti ang ai chyum mungga hpe myit sumru yu na matu shadum ya ai gaw , anhte ni kashin kamun hkam ai a marang e anhte a prat hpe lak lai ai hku galai shai kau ya ai hte anhte ni hpe Karai kasang a nhtum nwoi ai shi a salum hta shingbyi lu nga ai lam hpe tsun lai wa ai. Anhte a kashin kamun hkam la ai a marang anhte hpe “Karai Kasang a Kashu kasha ni” hku nna byin tai wa shangun ai. “ Ndai lam ni gaw San Yawhan jaw ya ai shi a kum la hku nre sha, anhte hkum nan gaja wa Karai Kasang kaw na htani htana asak hte rai nna Kawa ,Kasha , Chyoipra wenyi ni hte rau kanawn mazum matut mahkai lu ai chyeju ni hkam la lu ai hpe Wa Sarabyin kawn matut na tsun shadum lai wa ai. Anhte ni kashin kamun hkam ai a marang e nhtum nwoi ai shi a tsawra myit anhte hpe jaw ya ai hkyehkrang la ai chye ju hte htani htana shi a lata hte anhte hpe makawp maga da ya ai chyeju ni hpe lu la ai lam tsun lai wa ai.
Kashin kamun hkam ai gaw anhte hpe prat nna jaw ya ai sha n-ga, htani htana Karai Kasang a kasha byin tai lu ai chyeju mung jaw ya ai hpe chye da na matu tsun lai wa ai. Anhte ni tinang kashin kamun hkam ai nhtoi hpe dum ai hte matut ga sadi tawn da ga bai nna daini anhte ni kawn shi anhte hte rau rai nga ai hta sha n-ga anhte ni a kata e shi shang shingnu nga sai majaw chyeju dum nga ga. Wa Sarabyin kawn matut na anhte hpe shangai shaprat ya ai Kanu Kawa , sacramentu hte seng nna lam woi wa ai ni, anhte a gachyum gawoi ni hte anthe ni hte rau Madu Yesu hpe hkap la nga sai wuhpung wuhpawng ni hpe mung chyeju dum ra ai lam tsun lai wa ai. Wa Sarabyin kawn anhte kam sham ai kashu kasha ni hpe tinang hkum tinang ga san hpe san jep na matu aja wa tsun shadum lai wa ai. “Ngai kashin kamun hkam ai a marang e ngai hta kaba dik ai chyeju ni hkam la nga ai hpe dum chye nga kun”? “nye a prat hta Karai Kasang a nhtoi ngai hta htoi nga sai hpe dum nga ai kun, ngai hpe Karai Kasang a kashu kasha hku nna masha ni mu mada nga ma ai kun?” Wa Sarabyin kawn kam sham ai hpung masha ni hpe anhte ni kashin kamun hkam lai wa ai hpe myit dum nga ga, Karai Kasang hpe anhte ni prat hta hkap tau hkalum la ai hte udang masat hpe atsawm Kam sham ai myit hte galaw nga ga ngu yawng hpe saw shaga lai wa ai hte “ rau sha Kawa, Kasha, Chyoipra ai wenyi hpe galaw ga”.ngu nna tsun Lai wa ai. Wa Sarabyin kawn “wenyi ni a htingnu , Maria “Karai kasang a mau hpa chyeju kumla hpe hkap la ai hte shakawn shagrau ai hpe chye galaw na matu” anhte hpe karum ya rit. Hpang jahtum hku nna Wa Sarabyin Francis kawn St.Peter shawa pa kaba kaw du sa ai hpung masha ni hpe garai n shaman shi yang “Kanu Maria kawn anhte a lam hpe makawp maga ya na matu kyu hpyi ya lai wa ai” hpe chye lu ai. Bai yawng hpe tinang a kashin kamun hkam la ai nhtoi hpe dum nga na matu , lama na ndum ai rai yang lu hkra bai tam nna anhte a shangai nhtoi zawn shakawn shagrau kabu gara ai lam hpe galaw na matu n gun jaw tsun lai wa ai.