San Pra ai Stephen a Poi Nhtoi (December 26) 26 December 2023

San Pra ai Stephen a Poi Nhtoi (December 26)

San Pra ai Stephen gaw, Hkristian makam masham a majaw, shawng ning nan sat kau hkrum ai San Pra ai Masha rai nga ai. Shi gaw, Nawku Hpung a shawng na Deacon Magam Gun Wuhpung (Kasa ni hpe garum jaw ai wuhpung) shang langai mi mung rai nga ai. Shi gaw, shaman chyeju law law galaw ya lu nga ai. Shi a matsun maroi ga ni gaw, hpaji grai rawng ai lam hte shi a mai kaja ai myit jasat hte seng nna kadai n ningdang lu nga ai.

Dai majaw, Yerusalem mare kaw nga ai, Greek ga ga ai Yuda amyu (Hebru) sha ni gaw, Shi hpe Karai Kasang hpe shata nhkan ga tsun ai wa re, nga nna Sanhedrin ngu ai tara agyi ni a rung de dun garawt sa mat wa ma ai. Dai shaloi, San Pra ai Stephen a myi man gaw, Sumsing Lamu na Lamu Kasa a nsam zawn htoi kabrim wa ai. Shawa hpawng hpe; “Nanhte gaw, nanhte a jiwoi ni hte maren, Chyoi Pra ai Wenyi hpe galoi mung, ning hkap ai ni rai nga myit dai. Nanhte a jiwoi ni n zingri sat kau ai myithtoi kadai nga a ta?” nga nna akre lai wa ai.

San Pra ai Stephen tsun ai ga hpe na ai shaloi, Tara rung na masha ni yawng, grai pawt mat nna wa utik tik nga ma ai. Shi chyawm gaw, Chyoi Pra ai Wenyi a atsam hte hpring rai, lamu de mada nhtawm; “Sumsing lamu hpaw malang wa ra ai; Masha a Kasha gaw, Karai Kasang a hkra maga kaw tsap nga ai hpe mu lu nga ai.” nga nna tsun pru wa ai.

Dai hpang, shanhte gaw, Stephen hpe mare shinggan de dun sa wa nhtawm, nlung hte kabai sat hpang wa ma ai. Shaloi, San Pra ai Deacon Stephen gaw, (Kasa 7:59) kaw rawng nga ai hte maren “Madu Yesu e, nye nsa wenyi hpe hkap la ya rit law. Madu e, shanhte galaw nga ai ndai mara a majaw, shanhte hpe matai n dawk u ga law.” nga nna shi hpe sat shamyit shatsang nga ai ni a matu, hpyi nem let, nsa hti mat wa nu ai.

Dai zawn rai nna, San Pra ai Deacon Stephen hpe nlung hte kabai sat kau ai hpang, Nawku Hpung gaw, Shi a Poi Nhtoi hpe shaning shagu, Madu Yesu Shangai wa ai (Hkrismat Poi) a hpang shani, December shata (26) ya shani galaw ya nga ai gaw, daini na aten du hkra rai nga ai.  

Daini Nawku Hpung gaw, San Pra ai Deacon Stephen a Poi Nhtoi hpe galaw nga ga ai aten hta, anhte Hpung Masha ni mung, San Pra ai Stephen zawn, tinang lu da sai makam masham hpe kaning re ai ru yak jam jau lam, zingri zingrat lam ni hte hkrum kadup wa ai raitim, n nyet kau ai sha, gwi gwi sak se hkam lu ai ni, byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)