San Pra ai Chaeremon hte Ischyrion Yan a Poi Nhtoi (December 22) 22 December 2023

San Pra ai Chaeremon hte Ischyrion Yan a Poi Nhtoi (December 22)

A.D 247 ning hta Hkawhkam Decius e, tara jahkrat dat ai majaw, Alexamdria mare masha ni gaw, Hkristian Hpung masha ni hpe zingri sat shamyit ai lam laja lana rai galaw lai wa ma ai. Raitimung, Alexandria mare na, San Pra ai Saradaw Dionysius chyawm gaw, tara maigan masha ni garum ya ai majaw, ndai mang hkang kaw nna lawt lu mat ai.

San Pra ai Saradaw Dionysius gaw, Antioch mare kaw na, Saradaw Fabian hpang de ndai zawn Hkristian masha ni zingri hkrum nga ai lam laika hte shana dat wu ai. Dai laika hta: zingri sat shamyit ai kaw nna lawt lu na matu, Hpung masha ni gaw zaibru jang hkan hprawng nga timung, hkan rim la hkrum ai hpang mayam shatai na matu dut sha hkrum ma ai. Dai zaibru jang hkrun lam hta, grai katsi dat, kahtet dat, lamu marang htu dat, kaw si hpang gara hkrum, nam na matse labye dut sat ni hpe hkrit tsang ra ai lam ni lawm nga ai. Dai ni kaw na asak hkrung nga ai masha jahpan kaw, San Pra ai Chaeremon hte San Pra ai Ischyrion yan a mying mung shalawm taw ai hpe mu lu nga ai.

San Pra ai Chaeremon gaw, Niloolis mare kaw na, Saradaw rai nga ai; Shi gaw, asak grai kaba sai Saradaw mung rai nga ai. Dai zawn tara maigan ni sat shamyit na matu gyam hkawm hkrum ai Hpung masha ni kaw na marai langai mi gaw, shi hpe Arbia mung na, Bum ga de woi hprawng mat wa ai. Dai hpang shi a shiga gaw n na mat sai.

San Pra ai Ischyrion gaw, Egypt mungdan mare daju, Alexandria mare kaw na tara agyi langai mi a gumhpraw jahpan jum rai nga ai. Shi hpe tara maigan ni a hpara sumla naw shangun ma ai; shi gaw jahkrit shama, shagwi hkrum tingmung tsepkawp n hkan shatup ya ai. Dai majaw, tara maigan ni gaw shi a lagaw lata ni hpe kahtam di kau ya ai hpang jen noi sat kau ma ai.

Ndai San Pra ai yan hpe, Makam Masham a majaw, sat kau hkrum ai masha ni, Roman Martyrologo kaw December (22) ya shani e, shalawm shagrau da ya nga ai re.

Daini Nawku hpung gaw, San Pra ai Chaeremon hte Ischyrion Yan a Poi Nhtoi  hpe galaw nga ai aten, anhte sak hkrung hkawmsa lam hta mung, kaning re ai mayak mahkak lam ni, agung alau ni, zingri zingrat lam ni hkrum wa ai ratim, anhte lu da ai makam masham hpe majung jet kamsham nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)