San Pra ai Jane Frances de Chantal a Poi Nhtoi (December 12) 12 December 2023

San Pra ai Jane Frances de Chantal a Poi Nhtoi (December 12)

San Pra ai Jane Frances de Chantal gaw, Fransik Mungdan, Dijon mare kaw, lai wa sai 1572 ning hta lusu ai kun dinghku kawn shangai chyinghkai wa ai rai nga ai. Shi gaw, Visitation Order ngu ai “Kawan Katsan Mama Magam Gun Wuhpung” hpe gaw de hpang dat ai San Pra ai Masha rai nga ai. Shi a asak (20) ning hta Rabutin mare kaw na Christopher mying ai, Chantal ginwang up ai Fransik hpyen du kaw num wa mat ai. shi a Madu Wa Christopher gaw, 1601 ning hta nam de shan shachyut sa ai shaloi, yu shut nna manang ni a sinat pala hkra ai majaw si mat wa sai.

Dai majaw, Jane gaw, kasha ni hte rau shi a kanu yan kawa a nta nga ai Dijon mare de bai n htang wa mat ai. 1604 ning na, lani mi hta, San Pra ai Francis de Sales tara mungga htawn ai hpe grai na ra sharawng mat nu ai. San Pra ai Francis de Sales gaw, San Pra ai Jane a wenyi hte seng ai lam hta grai rai nna shalat shapan ya ai San Pra ai masha rai nga ai. Jane gaw, 1610 ning hta shi a kasha ni a matu lam shagu ra n rawng hkra lajang kau da ya n htawm, Mama tai na matu myit daw dan wu ai. Shi shang na Mama Wuhpung gaw, Annecy mare kaw nna sha naw de hpang ai. “Congregation of the Visitation, Kawan Katsan Mama Magam Gun Wuhpung” rai nga ai.

San Pra ai Jane Chantal gaw, Mama sa tai mat na nga nna, nta kaw nna pru wa na jahpawt e, shi a kasha langai mi gaw, Kanu lai pru wa na chyinghka kaw sa galeng pat shingdan taw nga wu ai; kanu a yaw shada ai hpe hkum pat ai lam rai nga ai. Kanu gaw, dai kasha hpe shing tawk kau nna pru mat wa nu ai. Jane Chantal a kawa gaw, ndaw yang kaw kasha jan hpe ala nga ai; kawa a man kaw du ai hte Jane Chantal gaw, lahput hputdi nhtawm, Kawa kaw na shaman mang gala ga hpyi wu ai. Kawa gaw, Jane a baw ntsa lata mara n htawm; “Ngai sha e, nang hpe wa gaw ya ten kaw nna Karai Kasang hpe ap jaw kau ni ai; Karai Kasang shaga ai de sa su. Karai Kasang a nta kaw ngai sha, nang du nga sai ngu nna wa gaw, myit lu nna, myit dik myit pyaw mat ni ai. Wa a matu akyu hpyi ya rit yaw.” nga nna matsun let, shaman shakram dat wu ai.

San Pra ai Francis de Sales hte San Pra ai Jane Francis de Chantal a lam woi ya ai majaw, Visitation Mama ni gaw, shanhte shachyen shaja gun hpai sa wa ai makam masham magam bungli lam hta grai awng dang mat wa masai. San Pra ai Jane Francis de Chantal gaw, shi a Mama manang ni hpe; “Ngai nau, ngai sha ni e, du daw sai hkaw nna makam masham a majaw, asak jaw kau ai hte maren re ai tsawra myit a majaw, si hkam ai lam ngu ai nga ai. Ndai sak jaw ai lam gaw, anhte langai hpra Karai Kasang hpe anhte a hkum ting ap jaw kau ai aten kaw nna hpang nhtawm, anhte hpang jahtum nsa sa jahtum kau da ai aten du hkra, grin nga ai.” nga nna ayan shadum ya ya re ai.

 San Pra ai Jane Frances de Chantal gaw, 1641 nng hta Madu kaw yup pyaw ban sa mat wa sai rai nga ai. Shi a Moi mang hpe Annecy mare na, San Pra ai Francis de Sales a lupwa makau kaw makoi mayang da nga ai.

Shi n-nga mat ai hpang, Nawku hpung kawn shi hpe San Pra ai Masha hku nna dang da let, Shi a Poi Nhtoi hpe mung, December (12) ya shani, ngu masat shagrau dat ya sai rai nga ai.  

Daini Nawku Hpung gaw, San Pra ai Jane Frances de Chantal a Poi Nhtoi hpe galaw nga ga ai aten hta, anhte hpung masha ni mung, anhte a sak prat hkrun lam hta, kaning re ai prat hte mi hkawm sa nga taw tim, tinang lu da sai makam masham hpe grau maden zinghka wa lu hkra shakut shaja nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December12

#St_Jane_Frances_de_Chantal