San Pra ai Cecilia a Poi Nhtoi (November 22) 22 November 2023

San Pra ai Cecilia a Poi Nhtoi (November 22)

San Pra ai Cecilia gaw, tsa ban (2) hta Roma mare kaba hta shangai chyinghkai wa ai rai nga ai. Shi a Kanu yan Kawa gaw, lusu nga pyaw ai ni rai ma ai. San Pra ai Cecilia hpe yu-ngwi nsen hte seng nna laksan kam shamyet lu ai San Pra ai Masha, nga nna masat shagrau ai rai nga ai. San Pra ai Cecilia gaw, Shi a prat tup hkawn sek prat hta sak hkrung nga na matu myit jahkut ai.

Raitimung, Kanu yan Kawa gaw, shi hpe Valerian mying ai lusu kasha hte dinghku de ya ma ai. Hkungran poi shani Cecilia gaw, shi hkrai sha dung nga nhtawm myit kaw nna Karai Kasang hpe mahkawn shagrau let akyu hpyi nga ai. Ndai lam a majaw, shi hpe yu-ngwi mahkawn hte seng ai san pra ai masha ngu nna masat hkrum ai rai nga ai.

Shan a hkungran poi shana e shan a gawk de shang wa ma ai shaloi; Cecilia a san seng ai myit jasat a majaw Valerian gaw, myit galai shai mat nna shan lahkawng gaw, dinghku kanawn ai lam n galaw na matu, myit jahkrup ai lam byin lai wa sai.

Dai hpang Valerian gaw, Kashin Kamun Sacramentu hkam la nu ai. Valerian Kashin Kamun hkam la ngut ai hte rau Cecilia a makau kaw lamu kasa langai mi tsap pru wa ai; Shi gaw, Cecilia a baw ntsa kaw numri pan, lili hka law pan ni hte nampan shang hkawng galaw nna shagup ya nga ai hpe Valerian hkum nan mu wu ai.

San Pra ai Cecilia gaw, Valerian a kahpu Tiburius hpe mung makam masham de lu woi bang sa lu sai rai nga ai. Dai yan nau gaw, A.D (192) ning, Hkawhkam Commodus a lak htak hta e, Nawku Hpung hpe zingri shamyit ai ten, Roma mare kawn nau ntsan ai, Pagus Triopius ngu ai shara kaw, makam masham a tara sakse tai nna sat kau hkrum lai wa masai.

Dai hpang kade nna yang, Cecilia hpe mung rim la kau ma ai. Cecilia gaw, shi a makam masham hte seng nna, tara agyi a man kaw n hkrit n tsang ai sha makawp maga ga tsun lai wa sai. Dai majaw, tara agyi gaw, San Pra ai Cecilia a du hpe masum lang kahtam nna htau sat kau shangun wu ai.

San Pra ai Cecilia a moi mang hpe San Pra ai Callistus a lupwa kaw makoi mayang nhtawm, hpang de gaw, Trastevere mare na, San Pra ai Cecilia a Nawku Htingnu (Church of Sancta Cecilia) de htawt makoi mayang da sai rai nga ai.

1599 ning hta Cecilia a moi mang hpe bai hpaw yu ai shaloi, shi a hkum tsawp ni hten yat ai lam tsep kawp n nga ai sha, yup pyaw nga ai nsam hte sha rai nga ai hpe bai mu lu ma ai.  

Cecilia n nga mat wa ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe November shata (22) ya shani ngu masat dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)