San Pra ai Lawrence O Toole a Poi Nhtoi (November 14) 14 November 2023

San Pra ai Lawrence O Toole a Poi Nhtoi (November 14)

San Pra ai Lawrence gaw, mung masa n pyaw nna, majan gasat nga ai ten, mung masha ni gaw, simsa lam a matu, akyu hpyi let simsa lam hpe myit madat ala nga ai ten hta sak hkrung nga lai wa sai. Shi gaw, Ireland Mugndan, Kildare mungdaw, Castledermot mare kaw, lai wa sai 1128 ning hta shangai chyinghkai wa ai rai nga ai.

San Pra ai Lawrence gaw, Shi a asak (10) ning sha naw rai yang, lahkawng lang ting rim da hkrum nna, hpang jahtum gaw, Glendalough mare na, Saradaw hpang de bai dat dat ya ma ai. Shi gaw, Saradaw a kasi kaja hpe mu nna, Jau Tai wa lu hkra shakut lai wa ai.

Lawrence gaw, 1153 ning, Shi a asak (25) ning hta Glendalough mare kaw, Jau tai Sacramentu hpe hkam la nu ai. Jau tai wa ai hpang, (8) ning na ai shaloi, Dublin mare a matu, Saradaw aya dang ai hkrum nu ai.

Saradaw Lawence gaw, shawa masha ni myit sim myit sa rai nga lu na matu, myit n htum ai sha, matut ding yang shakut ya ai. Shi a asak hte seng nna tsang ra ai baw law law mung hkrum katut lai wa sai. Shi a masha ni, myit sim myit sa hte nga lu na matu, seng ang ai up hkang salang ni hte ding yang htinglet ai lam galaw ya ai. Shi gram ya ai amu ni hta, England mungdan kaw na Nawku Hpung hkrang nkau hpe, Ireland mungdan kaw mung lang na matu lajang ya lai wa ai.

Saradaw Lawrence gaw, Ireland mungdan hte seng ai Wa Sarabyin a Dat Kasa aya dang da ai hpe mung hkrum lai wa ai. 1179 ning hta Roma mare kaw galaw ai Nawku Hpung ting hte seng ai Lateran Zuphpawng Kaba kaw mung, sa du shang lawm lai wa ai. Dai Zuphpawng Kaba ngut ai hpang, Ireland Mungdan de bai n htang du wa nhtawm, 1180 ning, November shata (14) ya shani, Madu hta yup pyaw ban sa mat wa sai rai nga ai.

Shi n nga mat ai hpang, 1225 ning, December shata (11) ya shani, dai aten na, Wa Sarabyin Honorius (3) kawn, Shi hpe San Pra ai Masha dang dat let, Shi a Poi Nhtoi hpe mung, November shata (14) ya shani ngu nna, masat shagrau dat ya sai rai nga ai.

Daini Nawku Hpung gaw, San Pra ai Lawrence O Toole a Poi Nhtoi hpe, galaw nga ga ai aten, anhte a Prat hta mung, tinang a prat hta yak hkak jamjau lam ni hte hkrum katut wa ai mi raitim, tinang a makau grup yin hte dum nta masha ni, manaw manang ni a ra rawng wa ai lam ni hta dang lu ai made garum la lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)