San Pra ai John Lateran Nawku Htingnu Poi (November 9) 09 November 2023

San Pra ai John Lateran Nawku Htingnu Poi (November 9)

Kahtawlik Nawku Hpung gaw, Roma mare kaw Nawku Htingnu (snr) Basilica kaba (4) hpe gaw gap da nga ai re. Dai ni gaw,

1). Kasa Petru a Nawku Htingnu = St. Peter’s Basilica

2). Kasa Pawlu a Nawku Htingnu = St. Paul’s Basilica

3). Mary Major Nawku Htingnu = Mary Major Basilica hte

4). Lateran mare na Yawhan a Nawku Htingnu = John Lateran Basilica ni rai nga ai.

Dai ni hta na, daini gaw, No (4) ngu na, Lateran mare na, Yawhan a Nawku Htingnu (John Laterean Basilica) a Poi Nhtoi rai nga ai.

Ndai Nawku htingnu hpe, Constantine hkawhkam gaw, Nawku Hpung hpe jaw da ya ai Lateran Mansion ngu mying ai shara kaw, A.D 313 ning hta gaw gap da nhtawm, dai hpe Hkyen La Madu Nawku Htingnu “Church of the Savior” ngu nna shamying hpang da ya sai rai nga ai. Dai hpang, Yawhan Baptista Masat Dingsat hku nna bai shamying la ai rai nga ai.

Dai John Lateran Nawku Htingnu kaw na, Nawku tawn madung “Main Altar” hta Kasa Petru hkum nan nawku tawn shatai lai wa sai hpun pyen nawku tawn hpe tawn da ai rai nga ai. Dai Nawku tawn ntsa na Chyoi Pra ai Hkum bang ai ja gawm, “Ciborium” ntsa kaw Kasa Pteru hte Pawlu yan a baw sumla ni hpe shakap da nga ai.

Ndai Nawku Htingnu gaw, Roma mare kaw na Saradaw hte Sarabyin a tara shang nta nan rai nga ai. Dai majaw, Nawku Htingnu kata de shang wa ai chyinghka ntsa e, “Urbis et Orbis Ecclesiarum Meter et Caput” (The Mother and Head of all Churches of the City and the World = Roma mare hte Mugnkan ting na Nawku Jawng ni yawng a Kanu hte Baw) nga nna ka shakap tawn da nga ai.

Ndai zawn ka shakap tawn da ai gaw, Wa Sarabyin hpe Nawku Hpung gaw hkungga tsawra let, shi hte myit mang langai sha rai nga ai, ngu ai kumla hpe shadan shaleng da ya ai rai nga ai. Bai ndai ka masat tawn ai ga baw gaw, Antioch mare na, San Pra ai Ignatius tsun ai: “Wa Sarabyin gaw, hpu nau tsawra myit hte seng ai wuhpung wuhpawng ting hpe yu gawn up hkang ai wa re” nga ai lachyum hpe madi shadaw da ai lam mung rai nga ai.

Daini Nawku Hpung gaw, San Pra ai John Lateran Nawku Htingnu Poi Nhtoi shani hta, Madu Yesu a Hkum (Chyoipra Hkum) nga ai Nawku Htingnu shing nrai Chyoipra Hkum Gawk ni de, tinang aten lu ai hta hkan na, sa du akyu hpyi la lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)