San Pra ai Luigi Guanella a Poi Nhtoi (October 24) 24 October 2023

San Pra ai Luigi Guanella a Poi Nhtoi (October 24)

San Pra ai Luigi Guanella gaw, Italy Mungdan, Campodollino mare kaw, 1842 ning, December shata (19) ya shani shangai chyinghkai wa ai rai nga ai. Shi gaw, shan nau ni marai (13) kaw na, No (9) ngu na shadang sha rai nga ai.

San Pra ai Luigi Guanella gaw, 1866 ning hta Jau tai Sacramentu hpe hkam la ai hpang, Ginwang up Jau lit shatsam ai hpe hkrum wu ai. Shi gaw, matsan ai masha ni hpe lak san matsan dum myit kaba tawn chye ai. Makam masham hpe mung, sung sung myit sumru yu nna hkan sa shatup chye ai. Hpung masha ni a rawt jat galu kaba lam hta mung, grai woi awn galaw ya lai wa sai.

1875 ning hta Jau Luigi Guanella gaw, San Pra ai Don Bosco hpe Hpung amu magam hte seng nna grai garum jaw ya lai wa sai. Dai hpang masum ning na ai shaloi, Shi a Saradaw shaga la nna shi a ginwang rai nga ai Como Saradaw ginwang de bai du wa ai. Matsan dik ai masha ni nga ai lawk kaw shi hpe lit shatsam ya ma ai. Dai shara gaw, mang hkang magup, ayak ahkak hpan shagu nga ai shara mung rai nga ai.

Dai majaw, shi gaw, masha ni nga na dum nta ni, laika sharin jawng ni hpe shawng gaw gap ya lai wa ai. Dai hta n-ga, “Matsan Dum Lama ai Magam Gun Wuhpung” (Servants of Charity) hte “Machye Machyang a Kanu Maria a Shayi Sha Ni Magam Gun Wuhpung” (Daughters of St. Mary of Providence) ngu ai Sasana Magam Gun Wuhpung ni hpe gaw de hpang ya lai wa sai.

San Pra ai Luigi Guanella gaw, 1915 ning, October shata (24) ya shani, Madu hta yup pyaw ban sa mat wa sai rai nga ai.

San Pra ai Luigi Guanella n nga mat ai hpang, 1964 ning, October shata (25) ya shani, dai aten na Wa Sarabyin Pawlu (6) kawn, Shi hpe A Lu ai Masha masat shagrau dat sai rai nga ai.

Dai hpang, 2011 ning, October shata (23) ya shani, ya hkring sa mat sai rai nga ai, Wa Sarabyin Benedict (16) kawn Shi hpe San Pra ai Masha dang dat let, Shi a Poi Nhtoi hpe mung, October shata (24) ya shani ngu masat shagrau dat ya sai rai nga ai.

Daini Nawku Hpung kawn, San Pra ai Luigi Guanella a Poi Nhtoi hpe galaw nga ga ai aten hta, anhte mung, Wa Jau Luigi Guanella zawn, tinang ang ai magam lit hpe kang ka ai hte galaw chye ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

Luigi Guanella