Wudang Hpe Laksan Hkungga Shagrau ai San Pra ai Pawlu a Poi Nhtoi (October 20) 20 October 2023

Wudang Hpe Laksan Hkungga Shagrau ai San Pra ai Pawlu a Poi Nhtoi (October 20)

San Pra ai Pawlu hpe, Wudang hpe laksan hkungga shagrau chye ai Jau, nga nna shakawn shagrau ai rai nga ai. Shi gaw, Madu Yesu hkam lai wa ai N-ni N-kri Yubak lam ni hte seng ai Jau Sasana Wuhpung (Passionist Congregation) hpe de hpang da ya ai San Pra ai Masha wa mung rai nga ai.

San Pra ai Pawlu gaw, 1694 ning hta Italy Mungdan, Ovada mare kaw shangai chyinghkai wa ai rai nga ai. Kaji ai aten kaw nna, San seng san pra let sha nga kaba wa ai. Shi a asak (15) ning du ai lani mi hta, Madu Yesu a N-ni N-kri Yubak lam hkaw tsun ai mungga hpe shi na hkrup ai. Dai shani kaw nna, shi gaw, tara shadik let azim sha nga nna akyu hpyi shaja na hpang mat wa nu ai.

1720 ning na lani mi hta, shi kaw Chyoi Pra ai Nu ai Maria dan pru nna, shi a kasha shing tai “Yesu a N-ni N-kri Yubak Lam” ni hpe galoi mung myit dum sumru na matu hte “Shang-gan bu hpun ai sasana magam gun wuhpung langai mi” hpe gaw de hpang na matu, shangun ai hpe hkrum wu ai.

Dai majaw, shi gaw Nawku Hpung Ginjaw de ahkang sa hpyi na matu, Roma mare de sa mat wa ai. Ginjaw kaw na ahkaw ahkang sa hpyi ngut nna bai n htang wa ai shaloi, grai tsawm ai “Monte Argentario” ngu ai Bum Mayan hku nna lai ang hkrup wu ai. Dai Bum Mayan gaw grai tsawm ai majaw, shi a kanau John Baptist hte rau dai kaw tara shadik, shakut na matu nga mat na daw dan kau wu ai.

Shan-nau gaw, jau tai ai Sakramentu hpe hkam la lu ai hpang, Italy Mungdan shara shagu hkan myit sumru akyu hpyi wutsawk ni woi galaw ai hte machyi makaw hkrum nga ai ni hpe sa du gawan gatsan ai amu ni galaw lai wa ma ai. Shanhte gaw, Madu Yesu a N-ni N-kri Yubak a lam hkaw dan nna, masha ni galaw kau sai shut hpyi mara a majaw tinang hkum tinang hpe shawa a man kaw gayet zingri ai lam galaw ma ai.

San Pra ai Jau Pawlu hpyi shawn ai hte maren, 1741 ning hta, dai aten na Wa Sarabyin Benedict (14) gaw, Madu Yesu a N-ni N-kri hte seng ai Sasana Magam Gun Wuhpung (Passionist Congregation) hpe hpaw hpang na matu ahkang jaw masat shagrin dat ya sai.

Shanhte a Wuhpung hpe “Passionist” ngu nna masha law malawng chye ma ai rai nna, Matsan jam jau hkam ai, San seng san pra ai hte madat mara ai ngu ai ga sadi masum hpe hkam la ai ni rai nga ai. Bai dai hta langai mi gaw, Madu Yesu a N-ni N-kri hte seng ai lam ni hpe hpung masha ni grau nna mu mada kam sham wa lu na matu ngu ai Ga sadi langai mi bai jat bang ai majaw, Ga sadi (4) hte magam gun ai Jau Wuhpung ni rai nga ai. Dai Sasana Magam Gun Wuhpung gaw de hpang ai hte kalang lata jawngma ramma ni grai du shang wa ma ai.

San Pra ai Jau Pawlu gaw, n dan n dawng ai sha nga ai hpe ra sharawng ai wa mung rai nga ai. Shi a Sasana Magam hta shakut shaja ai lam ni a majaw, 1747 ning hta gaw, Shanhte Jau Wuhpung a Jau Kaba (General Superior) hku nna lata dat ai majaw, shi a ngam nga ai asak aprat ni hpe Roma mare kaw sha magam gun hpai lai wa sai rai nga ai.

 Ndai zawn rai nna, Sasana magam bungli ni hpe gun hpai taw nga yang, 1775 ning, October shata (18) ya shani, shi a asak (81) ning hta, Madu kaw yup pyaw ban sa mat wa sai rai nga ai.

Shi n nga mat ai hpang, 1853 ning, May shata praw (1) ya shani hta, dai aten na Wa Sarabyin Pius (9) kawn, Shi hpe A-lu ai Masha hku nna masat shagrau dat sai rai nga ai.

Dai hpang, 1867 ning hta gaw, Wa Sarabyin Pius (IX) sha, Shi hpe San Pra ai Masha dang dat let, Shi a Poi Nhtoi hpe mung, October shata (20) ya shani ngu masat shagrau dat ya sai rai nga ai.

Daini Nawku hpung gaw, San Pra ai Pawlu a Poi Nhtoi hpe galaw nga ai hte maren, anhte mung, Madu Yesu a N-ni N-kri hte seng ai lam ni grau grau nna myit dum sumru let, sak hkrung hkawmsa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)