San Pra ai Reparata a Poi Nhtoi (October 8) 08 October 2023

San Pra ai Reparata a Poi Nhtoi (October 8)

San Pra ai Reparata gaw, Palestine Mungdan, Caesaria Ginwang hta, lai wa sai tsa ban (3) ram hta sak hkrung nga lai wa sai rai nga ai. Shi gaw, Hkristian Hpung masha shagu gaw, tinang a makam masham hta sha prat tup sadi dung manoi manat nna sak hkrung nga sa wa na lam, sakse madun ya ai san pra ai masha langai mi rai nga ai. Bai nna, shi gaw, Karai Kasang hpe kam shamyet ai majaw, zingri zingrat hkrum nhtawm asak si hkrum ra na lam hpe mung tsep kawp n hkrit n tsang wu ai.

San Pra ai Reparata gaw kaji ten kaw nna nan Hkristian Makam Masham hta myit maju jung ai numsha rai nga ai majaw, tara maigan ni, nat jaw ni a dingbai dingna agung alau hpe aloi sha ninghkap kau lu ai. Caesarea mungdan na Hkawhkam Decius gaw, Nawku Hpung hpe laja laja rai zingri shamyit wa ai shaloi, Reparat mung Hkristian Hpung masha re ai lam hpe chye mat nna rim la nhtawm, laja lana jahkrit shagwi yu, zingri yu ma ai. Dai daram zingri shatsang hkrum timung, Reparata gaw, aloi sha ninghkap kau lu sai.

Ndai lam gaw, shi a san seng san pra ai myit jasat, makam masham hta manoi manat ai myit jasat a majaw rai nga ai. Shi hpe zingri shatsang ai ni a matu galoi mung, akyu hpyi ya ai. Hpang jahtum e, Reparata hpe wan mang kata de kabai bang kau ma ai. Raitimung, San Pra ai Reparata gaw dai wan mang kata kaw nna majing malang bai pru wa ai. Dai majaw, shi a baw hpe kahtam di kau ya hkrum nna nsi hti mat wa sai rai nga ai.

San Pra ai Reparata n nga mat ai hpang, Nawku Hpung gaw, shi hpe San Pra ai Masha dang dat let, Shi a Poi Nhtoi hpe mung, October shata (8) ya shani masat shagrau dat ya sai rai nga ai.

Daini Nawku hpung kaw nna, San Pra ai Reparata a Poi Nhtoi hpe galaw nga ai shaloi, anhte a myit masin hta mung, kam sham myit maju jung lu na atsam Karai Kasang Wa grau nna jaw ya rit ga matu, akyu hpyi let hkawmsa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)