Brogne Mare na San Pra ai Gerard a Poi Nhtoi (October 3) 03 October 2023

Brogne Mare na San Pra ai Gerard a Poi Nhtoi (October 3)

San Pra ai Gerard gaw, A.D 895 ning hta shangai chyinghkai wa ai rai nga ai. Shi a kanu yan kawa gaw dinghku pyaw ai hte hpyendu htinggaw na ni rai nga ai. Lani mi hta shi gaw, Namur ginwang up du a malai Belgium Mungdan de, hpyen ma ni hte rau sa du ai. Dai hkrun lam hta shi gaw San Pra ai Denis hpaw da ai Tawra Jau jawng na, shanhte a nga sat nga sa lam hpe sa mu nna grai yu sharawng mat nu ai. Dai majaw, dai hkrun lam kaw nna nta de bai nhtang du wa ai shaloi, shi lu tawn da ai mungkan a ahkang aya ni hpe rap shingdu tawn kau nna Tawra Jau jawng de sa mat ai, dai hpang shi mung Tawra Jau tai wa sai rai nga ai.

Jau Gerard gaw, Nawku Hpung kata na shading sharai ra ai lam ni hte seng nna, akyu hpyi shaja ai hte kaja ai kasi hte rau gram lajang ya lu wu ai. Shi Jau tai ai (11) ning na ai hpang, shi a Jau kaba gaw, shi hpe Brogne mare hta Jau jawng langai mi sa hpaw shangun wu ai. Shi a Kanu yan Kawa kawn Shi hpe kumhtaw jaw da ai lamu ga shara kaw e, jawng sa gap ya ai; dai jawng kaw shi lit hkam Jau kaba tai wa sai. Shi a rau rum manang Jau ni hpe hkansa rit kawp tara hte seng nna, n-gup aga hte kasi kamang hte sharin matsun ya ai majaw, jawng dai gaw grai mying kaba wa sai rai nga ai.

Shi a sak hkrung aten tup, Jau jawng ni hte seng ai galai gram ra ai amu ni hpe galaw lai wa sai. Shi a prat tup akyu hpyi shaja ai hte azim sha nga chye ai sat lawat hte kasi madun nga lai wa ai lam, shi a labau hta ka matsing da nga ai.  

Ndai zawn, San Pra ai Jau Gerard gaw, Karai Kasang Wa a lit magam gun hpai taw nga ai ten, A.D 959 ning, October shata praw (3) ya shani, shi a asak (64) ning hta, Madu kaw yup pyaw ban sa mat wa sai rai nga ai.

Jau Gerard n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, October shata praw (3) ya shani ngu masat shagrau dat ya sai rai nga ai.

Daini Nawku hpung kaw nna, San Pra ai Jau Gerard a Poi Nhtoi hpe galaw nga ga ai hte maren, anhte hpe Karai Kasang Wa gaw, kaning re ai lit magam gun hpai na matu saw shaga taw nga ai re kun? ngu ai lam hpe asan sha myit dum sumru nna, Madu Karai Wa myit ra ai hku nna hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)