San Pra ai John Chrysostom a Poi Nhtoi (September 13) 13 Sept 2023

San Pra ai John Chrysostom a Poi Nhtoi (September 13)

San Pra ai John Chrysostom gaw, “Tara Hkaw ai ni a laksan kam hpa ai San Pra ai Masha” (Patron of Preachers) rai nga ai. Shi gaw, A.D (347) ning hta, Turkey Mungdan na Antioch mare kaw shangai chyinghkai wa ai rai nga ai. Shi hpe Chrysostom, Golden Mouth “Ja N-gup” ngu shamying ya ai lam gaw, shi a mungga htawn ai ladat hta grai ning tawn ai shaman chyeju atsam a majaw rai nga ai. Ga shaga hpaji hpe dai aten na mying kaba dik ai Sara Libanius kaw na sharin la lu ai rai nga ai. Nnan daw hta e, shi gaw mying grai kaba ai tara sara tai lu hkra yaw shada tawn ai re. Raitimung, shi a asak (18) ning du ai shaloi, Antioch mare na Saradaw Meletus a lata hta hpung shang wa ai hpang Tawra Jau tai na matu myit hkut da nu ai.

San Pra ai John Chrysostom A.D (386) ning hta Jau tai wa nna, A.D (398) ning hta Constantinople mare na, Saradaw lit shatsam ai hpe hkrum nu ai. Shi shawng ning nan gram ai bungli gaw, shi a shawng na ni ja gumhpraw hpe n ra ai kaw jai lang ai wa ai zawn n rai na matu, galai lajang nhtawm, matsan mayan re ai ni hpe garum ai amu hpe dating galaw shakut wu ai. Dai hpang, Jau ni hpe n gup aga hte kasi hte shading sharai ya mat wa wu ai.

Shi a alak mi rai nna tara hkaw shatsam chye ai atsam a majaw mying grai kaba ai. Raitimung, A.D (403) ning hta shi mang hkang kaba hkrum nu ai. Dai gaw, Hkawhkam jan, Empress Eudocia hpe Jezabel ngu tsun ai majaw, shi hpe Bithynia Mungdan de gawt shapraw kau ma ai. Dai hpang kade nna yang, Constantinople mare kaw nnang nawn kaba byin ai; dai gaw, Karai Kasang ari dan jaw ai re, nga nna myit la ma ai majaw, Saradaw John Chrysostom hpe tin shapun nan bai shaga la ma ai. Dai mabyin a ning pawt gaw, Church of Holy Wisdom mying ai Nawku Jawng ndaw kaw hkawhkam jan a gumhpraw jamoi hte galaw ai sumla jun tawn ai hpe shi laja lana ninghkap ai majaw rai nga ai.

San Pra ai Saradaw John Chrysostom gaw, Constantinople shara kaw na gawt shapraw hkrum ai aten hta mayak mahkak law law hkrum katut ai sha n-ga, shi hpe sin ai ni e zingri shatsang ai majaw, A.D (407) ning hta nsa hti mat wa sai rai nga ai. Shi a moi mang hpe Constantinople mare na, Church of the Apostles “Kasa Ni a Nawku Htingnu” kaw makoi mayang da ai rai nga ai.

Saradaw John Chrysostom n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, September shata (13) ya shani masat shagrau dat ya sai rai nga ai.

Daini Nawku Hpung gaw, San Pra ai Saradaw John Chrysostom a Poi Nhtoi hpe galaw nga ga ai aten hta, anhte hpung masha ni mung, Wa Saradaw zawn, tinang lu da sai makam masham nli tum hpe hpunau ni hpe atsawm sha chye hkai tsun dan lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)