Karai Kasang A Manu Dan Dik Ai Tsawra Myit Hpe Anhte Ni Sawk Tam Chye Ai, Mu Chye Ai Hte Kabu Gara Ai Hte Hkap Hkalum La Chye Ga

Laban shani na Missa hta Wa sarabyin Francis kaw na Karai Kasang a Manu dan ai Tsawra Myit hpe anhte ni Tam chye ra ai, dai hpe mu chye la ai hte anhte ni a masin salum hta kabu gara ai hte hkalum la chye ra ai lam hpe galaw chye na gaw ahkyak htum re ai lam hpe tsun lai wa sai. Wa sarabyin Francis gaw lai wa sai Laban shani na ja chyum mungga hta Madu Yesu tsun lai mat sai ga shadawn rai nga ai Hpaga ga ai wa gaw manu dan ai nhprang rai (Pearls) hpe mu ai hte manu dan ai rai re ai hpe chye ai a majaw dai rai hpe mari na matu shi hta nga ai mahkra hpe dut na matu galaw lai wa ai lam hpe tsun lai wa ai.

Wa sarabyin kawn Hpaga ga ai wa (merchant) hte seng nna anhte a prat hta e shi zawn tatut jai lang mai ai ladat masum rai nga ai sawk tam chye ai, mu chye ai, mari la lu hkra galaw ai( Seeks, Finds and Buys) ngu ai ndai lam hpe mai galaw nga ai nga nna tsun lai wa sai. Wa sarabyin tsun ai hta Hpaga ga ai wa (merchant) zawn anhte ni hta kaja ai pan dung nga ra ai, dai zawn nga ai hte maren anhte ni manu dan ai rai hpe tam sa wa ra ai, dai rai yang teng sha grai manu dan ai hpe lu la na hte tinang hta nga ai lam ni hte sha myit shadik nna nmai nga ai lam hpe mung tsun lai wa sai.

Wa sarabyin kawn anhte hpe Karai Kasang hta nnan re ai hpe hka ja ai hte tam na myit ni rawng ra nga ai, hpa majaw nga yang Karai Kasang gaw bungli hpe bai gahtap gahtap rai na n galaw ai, rai tim anhte a prat hte seng ai lam ni hpe gaw nnan chyu sha shabyin ya nga ai lam hpe tsun lai wa sai.

Wa sarabyin  matut nna anhte hpe tsun shadum ai hta Hpaga ga ai wa gaw shi hta e zen ai myi nga ai a majaw manu dan ai nhprang rai (pearls) hpe gara hku tam na hte manu dan ai hpe chye lu ai zawn anhte a myi hpe mung zen ra ai ngu ai lam hpe tsun lai wa sai. Matut nna sha kaja ai manu dan ai rai law law hpe madun da ai hta na kaja ai hte hkrak dik ai hpe myit galu ai hte chye lata la ra ai lam hpe mung shing daw let tsun lai wa sai. Wa sarabyin kawn anhte ni hpe ya na zawn sadi sahka let daw dan ai lam hpe galaw chye ai a marang e anhte ni gara gaw manu dan dik ai rai re ai nre ai hpe chye garan gin hka daw dan lu na matu sharin ya ai lam re ai hpe tsun lai wa sai.

Anhte ni tinang a prat hta gara gaw grau manu dan nga ai nhprang rai nga ai kun ngu ai hpe chye lu na matu tinang hkum hpe galoi mung shaman shakyang ai lam ni galaw ra nga ai hte gara gaw tinang a prat a matu akyu rawng nga ai kun, n rawng ai kun ngu ai hpe chye lu na matu tam sawk sagawn na lam mung ra nga ai. Anhte a prat hta shani shagu manu dan ai nhprang rai gaw Karai Kasang, bai masha law law hte hkrum zup lu ai a majaw byin lai mat sai ni hpe myit hta n bang da ai sha, anhte a aten ni hte majoi rau nga ai hku nna aten ni hpe majoi n jahtum kau ga ngu nna mung tsun lai wa sai.

Hpaga ga ai wa hpa majaw shi hta nga ai yawng hpe dut nna manu dan dik ai nhprang rai hpe mari mayu ai ngu ai ndai lam gaw shi a prat hta gara gaw grau gaja ai, lu su wa na hte ya na shi a prat hte hpang e hkam la lu na akyu hpe mu chye da ai a majaw rai nga ai hpe Wa sarabyin kawn tsun dan lai wa ai. Ndai zawn galaw ai lam gaw anhte ni manu dan ai nhprang sut rai hpe mu tam ai hte Karai Kasang hpe kabu gara hkap hkalum la ai lam hpe tsun shadum nga ai lam re hpe Wa sarabyin tsun sang lang wa sai.

Wa sarabyin kawn anhte ni Madu Yesu hte hkrum ai hte anhte a prat mung galai shai mat na hte Karai Kasang a Tsawra Myit majing hte pawn ba la ai hpe mung mu lu na lam hpe tsun lai wa sai. Wa sarabyin kawn gadun ai hku na hpaji byennya rawng ai Hpaga ga ai wa (wise merchant) a ladat masum hpe la kap na, anhte ni hpa hpe kaja tam nga ai kun? Anhte ni Karai Kasang hte hkrum lu na matu Kaja ai lam ni hpe galaw shakut nga ai kun? ngu ai hpe tinang hkum tinang san jep ra ai lam hpe tsun lai wa sai. Matut nna gara gaw kaja ai rai re ai hte Karai Kasang jaw ai rai re ai hpe chye gin hka lu ai zawn gara ni gaw anhte a matu akyu nnga ai hte gaman li la sha jaw nga ai ngu ai hpe tsan kau chye ra ai lam ni hpe mung tsun shadum lai wa sai.

Wa sarabyin kawn Missa ngut ai hte hpung masha ni hpe du na August 2 Bat masum ya daini kaw nna galaw sa wa na World Youth Day lamang hpe woi awn shang lawm na hte seng nna kyu hpyi garum ya na hpe saw shaga lai wa sai. Mung dan shagu na sa du ai Ramma ni yawng Kanu Maria a lam matsun madun ai a marang e kabu pyaw ai hte kahpu kanau ni shada hkrum zup lu ai zawn Karai Kasang hte mung hkrum lu na rai nga ai. World Youth Day pilgrims hte Mungkan ting na ramma ni gaw Nawku hpung a manu dan ai ningbaw ningla ni byin tai wa na matu mung Kanu Maria a lata hta ap ya ga