San Pra ai Cajetan a Poi Nhtoi (August 7) 07 August 2023

San Pra ai Cajetan a Poi Nhtoi (August 7)

San Pra ai Cajetan gaw, “Theatine Clerks Regular” mying ai sasana magam gun wuhpung hpe de hpang ai San Pra ai masha rai nga ai. Shi gaw, 1480 ning, October shata praw (1) shani hta Italy Mungdan, Vicenza Mare kaw shangai chyinghkai wa ai rai nga ai. Padua Dakkasu kaw na Tara Upade Janmau gup la ai hpang, shi a daidaw mare kaw tara rung amu madu, Senator Lit hpe lahkawng ning galaw gun hpai lai wa ai.

Raitimung, Shi galaw ai amu hpe nau n sharawng wa ai majaw Jau tai na shakut hpang nu ai. Ndai zawn rai nna, 1516 ning hta Jau tai wa sai rai nga ai. Hpung gawan hkawm ai sasana magam hpe madung tawn ai “Order of Clerks Regular” Wuhpung hpe de hpang sai. Dai wuhpung shang ni gaw: tara laika sharin ai, matsan ai ni hpe yu gawan ai hte Jau ni hpe madang shatsaw ya ai amu galaw ma ai. Shanhte a wuhpung de, Saradaw Theate shang lawm wa ai majaw, shi hpe shagrau ai hku nna, “Theatine” ni nga nna shamying ai rai nga ai.

Roma mare hpe Costable de Bomdon e htim zing la kau ai hpang, San Pra ai Cajetan hpe grai jam jau jaw lai wa masai. Dai majaw, Cajetan hte shi a manang ni gaw, Venice hte Naples Mare de yen mat nna, dai yang jawng nnan ni hpaw hpang ma ai. Shi gaw, shi de hpang ai Order of Clerks Regular Wuhpung a ningbaw mung tai lai wa sai.

San Pra ai Cajetan hpe shi a tsi sara ni gaw, hpun pyen pa ntsa n yup ai sha panep ntsa yup na matu shadut ai. Shaloi, “Nye a Hkye La Madu gaw Wudang ntsa si hkam sai; hpun pyen ntsa si na a hkang sha pyi ngai hpe jaw marit.” (My Savior died on a cross, allow me least to die on wood) nga nna bai tsun ai.   

Ndai zawn Wa Jau Cajetan gaw, Shi hpe shatsam tawn ai lit hpe n hkring n sa, matut dingyang shakut gun hpai ai hpang, 1547 ning, August shata (7) ya shani, Madu hta yup pyaw ban sa mat wa sai rai nga ai.

Wa Jau Cajetan n nga mat ai hpang, 1629 ning, October shata (8) ya shani hta dai aten na, Wa Sarabyin Urban (8) kawn shi hpe A lu ai Masha hku nna masat dang dat sai rai nga ai.

Dai hpang, 1671 ning, April shata (12) ya shani hta gaw, dai aten na, Wa Sarabyin Clement (10) kaw nna, Shi hpe, San Pra ai Masha hku nna dang dat let, Shi a Poi Nhtoi hpe mung, August shata (7) shani masat shagrau dat ya sai rai nga ai.

Daini Nawku Hpung gaw, San Pra ai Cajetan a Poi Nhtoi hpe galaw nga ga ai aten hta, anhte hpung masha ni mung, San Pra ai Wa Jau Cajetan a labau kadun hpe madat hkaja la lu sai hte maren, anhte a shani shagu na sak hkrung hkawmsa lam ni hta mung, kaning re ai ru yak jam jau lam ni hte hkrum kadup wa ai raitim, Madu Yesu a Kasi hpe la let hkawmsa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)