San Pra ai John Mary Vianney a Poi Nhtoi (August 4) 04 August 2023

San Pra ai John Mary Vianney a Poi Nhtoi (August 4)

San Pra ai John Mary Vianney hpe “Jau ni Laksan Kam Shamyet ai San Pra ai Masha” Patron of Priests, ngu nna masat shagrau nga ga ai re. Shi gaw, Fransik Mungdan, Dardilly Kahtawng na, matsan ai kanu yan kawa kawn 1786 ning, May shata (8) ya shani shangai chyinghkai wa ai rai nga ai.

Shi a asak (20) ning hta Lyons Mare na Jau Tai Jawng de shang mat wa ai raitimung, “Myit Sawn Hpaji” Philosophy hte “Karai Hpaji” Theology ni hpe shi n lu hkan ai; grai yak dum nga ai. Jau Tai Jawng up gaw, shi hpe shapraw kau na tsun ai shaloi, Ginwang up Saradaw gaw, “Nawku Hpung gaw, Hpaji kung zet ai Jau ni hpe sha ra kadawn nga ai n re; Chyoi Pra ai Jau ni hpe grau ra kadawn nga ga ai.” nga nna bai htan ya ai.

San Pra ai John Mary Vianney gaw, 1815 ning hta Jau tai wa nna, Kahtawng masha marai (230) sha nga ai, grai tsan ai shara Ars mying ai nam kahtawng kaw ginwang up Jau lit shatsam ya ma ai. Shi hkum hpe grai jam jau jaw ai sha n-ga, shi kaw mara sa raw ai ni a mara malai mung, shi she jam jau hkam ya ya rai nga ai. Shi gaw, masha ni hpe mara raw ya ai shaloi, shanhte a wenyi kata na lam chye ya ai; masha wuhpung hpe chye gang zinlum ai shaman chyeju atsam ni lu ai. Lani mi hta nari hkying hkum (14) mara raw ya ai; ngam ai aten hta ma ni hpe tara ga sharin ya nna, kaba ai ni hpe shanhte a shara kaw du hkra tara ga sa sharin ya ai.

Satan gaw, 1824 ning kaw nna, (30) ning tup, Wa Jau John Mary Vianney hpe zingri shatsang ai; kalang lang grai hkrit na zawn nga ai nsen, kalang lang gaw, ndi nda hkrup mara de shamu shamawt hkawm dan ai; kalang lang gaw, nta kata arung arai wan hkru ai zawn re ai nsam madun jahkrit ya ai. “Cure of Ars” nga nna shamying hkrum ai Wa Jau John Mary Vianney gaw, shi a manang Jau ni e mung, “Masha A Nya, Masu ai Wa” nga nna n kaw n law jahpoi asawng ai hpe hkrum ai.

Kalang mi na, shanhte Jau ni a Wutsawk myit sumru akyu hpyi nga ai aten hta Jau langai mi gaw, Jau John hpe; “Mana = Mad” ngu jahpoi asawng ga ai. Dai hpe na kau ai shanhte a Saradaw gaw, “Nye a Jau ni yawng mung shi zawn, loi sha pyi mana na hpe grai ra sharawng ai.” (I wish that all my clergy had a small grian of the same madness.) nga nna tsun ai. Jau John Mary Vianney gaw, shagrau shakawn ai lam ni hpe n ra sharawng wu ai.

1852 ning hta Jau John Mary Vianney hpe “Monsignor” ngu nna shagrau shamying ya ma ai. De a lachyum gaw, Kahtawlik Nawku Hpung kata kaw Hpung a matu alak mi rai nna shagrau ging ai Jau kaba ni hpe shagrau ya ai mying, English ga hku nna “My Lord” ngu ai ga hte maren, rai nga ai. Shi hpe “Monsignor” ngu shagrau ya ai mying hte hpawn, shagrau shalawm ya dat ai Gawm hte Shang-gang Hking hpe mung, dut kau nna matsan masha ni hpe garum jaw kau wu ai.

Ndai zawn rai nna, Karai Kasang Wa a yi ngam magam hta grai shakut shaja nga ai aten, 1859 ning, August shata praw (4) ya shani hta San Pra ai Wa Jau John Mary Vianney gaw, Madu kaw yup pyaw ban sa mat wa sai rai nga ai.

Wa Jau John Mary Vianney n nga mat ai hpang, 1905 ning, January shata (5) ya shani hta dai aten na, Wa Sarabyin Pius (10) kawn, Shi hpe A Lu ai Masha hku nna masat shagrau dat ya sai rai nga ai.

Dai hpang 1925 ning, May shata (31) ya shani, dai aten na Wa Sarabyin Pius (11) kawn Shi hpe San Pra ai Masha dang dat let, Shi a Poi Nhtoi hpe mung, August shata praw (4) ya shani ngu masat shagrau dat ya sai rai nga ai.

Dai hta n-ga, San Pra ai John Mary Vianney hpe, daini na aten du hkra, Ginwang up Jau (Jawng Dung Jau) ni a kasi kamang tai ai San Pra ai Masha Langai hku nna, August Shata Praw (4) ya shani hta shaning shagu, myit dum shagrau nga ding yang rai nga ga ai re.

Daini Nawku Hpung gaw, San Pra ai Wa Jau John Mary Vianney a Poi Nhtoi hpe galaw nga ga ai aten hta, ya ten, anhte a Buga hte Mungkan Mungdan Shara Shagu hkan Karai Magam Gun Hpai nga ai, Ginwang up Jau (Jawng Dung Jau) ni yawng a matu, lak san akyu hpyi ya let, shakawn shagrau ai lam ni galaw nga ga law.   

By;

Sister Rose Angeline Maran Nang Doi (SFX)

RVA-Kachin Service (Myitkyina)