Madu Yesu A Kasi Hpe Yu La Let Gat Hkai Na Hkum Lagawn U

July 16, lai wa sai Laban shani na Mung ga hta Wa sarabyin gaw Madu Yesu a nli tum gat hkai ai hpe kasi la let anhte mung yak hkak ai lam ni hkrum nga ai rai tim galoi mung kaja ai mungga nli gat hkai na hta n jahkring na lam Christan hpung masha ni hpe n-gun jaw shatsam ga tsun lai wa sai.

Wa sarabyin kawn St. Peter Square hta sa du ai kam sham ai kashu kasha ni hpe nli gat hkai mungga hte seng ai lam hpe Madu Yesu  nli gat hkai ai zawn galaw shakut lai wa ai hpe tsun lai wa sai.

Wa sarabyin shi hkum nan mung nli tum gat hkai ai lam gaw shi hpe galoi mung shadum saw shaga nga ai lam re ai hte masha shagu hpe mung Madu Yesu galaw lai wa ai zawn hkan galaw shakut lu na matu saw shaga dat ai. Matut nna Wa sarabyin kawn Madu Yesu mung anhte hta nli gat hkai mai ai lamu ga kaja ai shara nrai ai hpe chye nga tim galoi mung myit htum ai lam n nga ai sha anhte hta apu asi ni tai wa na hpe kam let nli gat hkai nga ai lam hpe mung kahtap nna tsun shana lai wa ai.

Madu Yesu Gaw Nli Tum Gat Hkai Ai Lam Hpe Galoi Mung Galaw Nga Ai

Wa sarabyin kawn ga shadawn langai jaw ai lam hta masha gaw tinang myit ra ai hku sha,hkan nna Mungkan lam hpe sha, hkap la kam sham ai hku nre ai sha Karai Kasang a nli hpe hkap la ai shing nrai nhkap la ai ni nga tim Madu Yesu gaw shi hpan ai masha shagu a masin salum hta a pu a si si wa na hpe kam ai majaw nli gat hkai taw nga ai rai nga ai..

Madu Yesu gaw nli tum kaja gat hkai ai wa rai nga ai, anhte ni nli gat hkai ai hta myit lagawn ai lam nnga ai sha tsawra myit kaba hte hkai ra nga ai. Madu Yesu shi anhte a myit masin, anhte a kyang lai len n kaja ai ni a majaw nli kaja ni hten mat mai ai hpe chye nga ai, rai tim shi anhte hta a pu asi ni law htam wa na hpe kam ding yang rai nga ai.

Kanu Kawa Ni Hpe Shadum Ai

Kanu Kawa ni hpe Makam masham hta myit kri dung ra ai lam tsun shadum lai wa ai.

Wa sarabyin tsun shadum ai hta kalang lang anhte a kashu kasha ni Kanu Kawa ni a sharin shaga ai lam ni hta nchye na ai lam, nhkap la ai lam ni nga wa ai rai yang myit n mai daw na lam tsun lai wa sai. Kaja ai nli tum sha ngam taw ai rai yang shi aten du yang tu pru wa na re hpe Wa sarabyin kawn tsun shadum lai wa sai.

Ramma Ni Hpe Saw Shaga Ai Lam

Anhte ramma ni mung ta tut hta nli tum gat hkai mai ai lam hpe Wa Sarabyin tsun lai wa sai.

Anhte ni Karai Kasang hte ni htep ai, kyu hpyi ai ngu ai gaw kaji ai zawn rai na n mu lu tim, dai nli tum hpe kam sham ai myit kaba hte anhte ni gat hkai ai rai yang, Madu Yesu kaw na anhte hpe bai dan shula lu hkra galaw ya na ra ai lam hpe Wa sarabyin tsun shadum lai wa sai.

Wa sarabyin kawn Ramma ni hpe kaja wa ra kadawn taw ai masha ni hpe garum shingtau ai ten ni mung anhte hta galaw ra ai lam hpe tsun shadum n-gun jaw lai wa ai. Anhte ni masha hpe garum ya ai ngu ai gaw ntsa lam hku yu yang sum mat ai zawn rai tim tatut hta san seng chyoi pra ai magam bungli langai rai nga ai hpe tsun shadum lai wa sai.

Jau Ni Hte Karai Magam Gun Ai Ni

Jau ni hte shinggan hpung masha hku Karai magam hpe gun hpai nga ai ni hpe nanhte Karai mungga hkaw tsun sak se hkam ai lam hta kalang ta awng dang ai lam nlu wa yang myitdaw myit hten ai lam hkum nga mu nga nna Wa Sarabyin tsun shadum n-gun jaw lai wa sai.

Anhte  Karai a mungga hpe hkaw tsun wa ai shaloi jang jang e n awng dang tim, anhte a magam bungli hta Chyoipra ai Wenyi gaw bungli galaw ya nga ai a majaw Karai Kasang a Mungdan lam gaw lani hte lani grau grau galu kaba wa nga ai, anhte ni shakut shaja ai htan pi grau galu kaba rawt jat wa nga ai hpe anhte galoi mung n malap ga ngu nna Jau ni yawng hpe tsun shadum lai wa sai.

Wa sarabyin Francis shi a mungga hpe hpang jahtum hku nna missa hta sa du shang lawm nga ai ni hte online hku nna shang lawm ai ni yawng hpe tsun shadum ai hta ngai kaja ai nli tum gat hkai nga ai kun? ngu ai ndai ga san hpe tinang hkum tinang bai san let sawn sumru yu na matu tsun lai wa ai.