San Pra ai Bridget a Poi Nhtoi (July 23) 23 July 2023

San Pra ai Bridget a Poi Nhtoi (July 23)

San Pra ai Bridget gaw, 1303 ning hta, Sweden Mungdan, Uppland hta shangai chyinghkai wa ai rai nga ai. Shi a asak (10) ning du ai shaloi, Madu Yesu Wudang ntsa jen noi taw nga ai shingran mu ai. “Madu e, nang hpe ndai zawn kadai di ai rai ta? ngu nna san ai shaloi, “Ngai hpe jahpoi asawng ai ni, nye a tsawra myit hpe n gawn n sawn di ai ni ndai zawn galaw ma ai.” nga nna bai htan pru wa ai. Dai aten kaw nna, Bridget a myit kraw lawang hta Madu Yesu a Nni Nkri lam gaw madung tai ru jung mat wa nu ai.

Bridget gaw, Ngwi pyaw ai kun dinghku hpe (28) ning de nna kasha marai (8) a chyinghkai Kanu mung rai nga ai. Madu wa n nga mat ai hpang, shi gaw, Third Order of St. Francis Mama Wunhpung de shang nhtawm, matsan mayan rai nga nna, akyu hpyi shaja let tara shadik nna nga mat ai.

Shi a ma ten na shingran ni gaw, ya aten hta jahkring hkring sha byin wa wa rai nga ai. Shi Shingran ai lam ni hpe Alvstra Tawra Jau Jawng na, Jau Kaba Peter Olafsson hpe wa tsun dan shangun ai. Shingran langai mi kaw, Madu Yesu hkum nan Bridget hpe Magam Gun Wuhpung langai mi de hpang shangun ai. Dai Wuhpung hpe Brigittines ngu shamying ai; Wuhpung Shang ai ni gaw, matsan mayan re ai Mama Jawng kaw nga nna, ra ai hta jan ai arai yawng matsan masha ni hpe gam garan jaw kau ma ai. Raitimung, Laika buk ni hpe gaw shanhte ra sharawng ai daram mai kyem da ma ai.

San Pra ai Bridgit gaw, Palestine Mungdan de makam masham hkrunlam kalang mi sa ai hta lai nna, shi a prat tup Roma mare kaw sha tara shadik nga lai wa sai. Shi gaw, Nawku Hpung kata na shading sharai ra ai lam ni hpe grai n gun jaw ai; shani shagu mara raw; aten tup mani sumsai re ai myi man hte nga ai.

San Pra ai Bridget gaw, 1373 ning, July shata (23) ya shani hta Madu kaw yup pyaw ban sa mat wa sai rai nga ai.

Shi n nga mat ai hpang, 1391 ning, October shata (7) ya shani hta, dai aten na Wa Sarabyin Boniface (9) kawn shi hpe San Pra ai Masha dang dat let, Shi a Poi Nhtoi hpe mung, July shata (23) ya shani masat shagrau dat ya sai rai nga ai.

Daini Nawku Hpung gaw, San Pra ai Bridget a Poi Nhtoi hpe galaw nga ai aten hta, anhte a prat hta mung, San Pra ai Bridget zawn, Karai Kasang Wa byin shangun mayu ai lam ni hpe galoi mung myit sawn sumru yu na, hkrang shapraw hkan galaw lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)