San Pra ai Grimbald a Poi Nhtoi (July 8) 08 July 2023

San Pra ai Grimbald a Poi Nhtoi (July 8)

San Pra ai Grimbald gaw, tsa ban jahku, A.D (820) ning hta Belgium mungdan, Flanders mare kaw shangai wa ai rai nga ai. Shi Tawra Jau tai wa ai hpang shi hte ma prat hta rau nga kaba lai wa ai, England mungdan na hkawhkam Alfred gaw, shi hpe English ramma ni hpe laika hpaji sharin shapan ya na matu hpyi nem wu ai.

A.D (885) ning hta, England mungdan na, Oxford kaw jawng nnan hpaw hpang na matu lit shatsam hkrum lai wa ai. Wa Jau Grimbald gaw, Chyum Mungga hte Mahkawn Mangwi Music ni hta grai ning tawn ai majaw, lit dai shatsam hkrum sai. Rai timung, dai Oxford Dakksu kaw shi a shawng du nga sai Sara ni gaw, Wa Jau hpe manawn ai majaw, grai yawn mat ai hte England Mungdan, dingda maga de na, Winchester de htawt nawt magam gun lai wa sai. Dai aten du hkra, shi a manang Hkawhkam wa hte gaw matut mahkai ding yang naw rai nga nu ai.

Wa Jau Grimbald gaw, Hkawhkam Alfred hpe Winchester kaw, New Minister mying ai jawng gap na matu hpaji jaw wu ai. Ndai jawng kaba hpe Alfred Hkawhkam a kasha Edward gap shakre nna, dai kaw na Jau kaba lit shatsam ai majaw, Wa Jau gaw, makam masham hte seng ai lit magam ni hpe gun hpai lai wa sai rai nga ai.

San Pra ai Grimbald gaw, England mungdan hta (18) ning tup hpung magam gun ai hpang machyi kaba hkrum wu ai. Dai majaw, Namman chya Sakramentu hte kaga wenyi hte seng ai lam ni hpe atsawm lajang shachyip nna, Karai Kasang Wa hte arau nga nga nhtawm, A.D (903) ning, July (8) ya shani hta Madu kaw ban sa yup pyaw mat wa sai rai nga ai. San Pra ai Grimbald gaw, shi a hpang hkan ni shing grup akyu hpyi ya nga ai kaw e, nsa hti mat wa ai rai nga ai.

San Pra ai Grimbald n nga mat ai hpang, Nawku Hpung kawn, Shi hpe San Pra ai Masha dang dat let, Shi a Poi Nhtoi hpe mung, July shata (8) ya shani masat shagrau dat ya sai rai nga ai.

Daini Nawku Hpung gaw, San Pra ai Grimbald a Poi Nhtoi hpe galaw nga ai aten hta, anhte Hpung Masha ni mung, anhte a prat hta kade mi mai kaja ai lam galaw tim, kalang lang manaw masham, n ju n dawng lam ni hte hkrum sha chye nga ai hpe galoi mung myit dum let, tinang a myit hpe bai sharai nhtawm, manu dan ai hte sak hkrung hkawmsa lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)