Roma Mare Kaba Hta Nawku Hpung a Shawng na Makam Masham a Majaw, Sat Hkrum ai ni (June 30) 30 June 2023

Roma Mare Kaba Hta Nawku Hpung a Shawng na Makam Masham a Majaw, Sat Hkrum ai ni (June 30)

A.D (64) ning hta Nero Hkawhkam e Hpung Masha ni hpe zingri ai hta sat shamyit hkrum ai ni gaw, Nawku Hpung a Makam Masham a Majaw, shawng ningnan sat kau hkrum ai San Pra ai Masha ni rai ma ai. Dai shaning  hta Roma mare ting, (9) ya tup wan hkru ai majaw, mare a htam (3) kawn htam (2) ram wan hta lawm mat wa ai. Wan hkru hpang nna masum ya na ai shaloi, Nero hkawhkam hpe Maecenas Langchyi “Tower of Maecenas” ntsa kaw Troy mare wan hkru ai shaloi, Priam ka shagawp tawn ai kabu gara ga shagawp hti pyaw taw nga ai hpe mu lu ma ai.

Ndai zawn Nero Hkawhkam kabu nga ai hpe mu nna Roma mare masha ni gaw, Nero Hkawhkam hpe wan nat ai wa nga nna myit la ma ai. Shi hpe mara jawm shagun ai kaw na lawt lu na matu, Nero Hkawhkam gaw, Hkristan Hpung masha ni hpe mara galai shagun nna zingri shamyit let shi a mara hpe makoi magap kau nu ai.

Nero Hkawhkam gaw, Hkristan Hpung masha ni hpe shawa hpawng e jahpoi asawng ya na shana ten hta shi a nampan sun “Nero’s Gardens” kaw shanhte hpe ladat amyu myu hte zingri sat kau lai wa ai. Shanhte malawng maga hpe matse labye dusat ni a hpyi jahpun nhtawm gwi ni e kawa sat sha kau shangun ai. Nkau mi hpe gaw, Jen joi sat kau ai, nkau hpe gaw, wan sau (Dat-si) chya nhtawm hpri chyinghki ni hte mahkyit jahpe ai ya ai hpang, shana ten shadaw kaw gyit noi nna wan shachyi let, masha wan shingnan shatai, zingri sat kau ma ai.

Ndai zawn masha myit n rawng ai sha zingri sat shamyit ai ladat hpe Roma mare masha ni grai yu hkrit ai hte sat hkrum ai ni hpe grai matsan dum wa ma ai. Dai majaw, Roma mare masha ni law law, Madu Yesu hpe hkap la wa shangun ai lamik kumla byin wa shangun sai.

Dai zawn rai nna, Nero Hkawhkam kawn sat shamyit kau ai, Hpung Masha ni hpe, Nawku Hpung a Shawng na Makam Masham a Majaw, Sat Hkrum ai ni ngu nna, Nawku Hpung Kawn Shaning Shagu June shata (30) ya shani ding yang galaw ya nga ga ai re.

Daini Nawku Hpung gaw, Roma Mare Kaba Hta Nawku Hpung a Shawng na Makam Masham a Majaw, Sat Hkrum ai ni hpe alak mi myit dum akyu hpyi ya ai aten hta, anhte Hpung masha ni mung, tinang a makam masham a majaw, kaning re ai ruyak kin dut lam ni hte hkrum kadup wa ai raitim, tinang lu da sai makam masham hpe n nyet kau ai sha, gwi gwi rai sakse hkam lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)