San Pra ai Irenaeus a Poi Nhtoi (June 28) 28 June 2023

San Pra ai Irenaeus a Poi Nhtoi (June 28)

San Pra ai Saradaw Irenaeus gaw, A.D (130) ning hta Asia Minor kaw shangai wa nna, Fransik Mungdan, Lyons mare kaw na Saradaw lit gun hpai lai wa sai rai nga ai. Shi gaw, Samina (Shing n rai) Smyrna mare na, San Pra ai Saradaw Polycarp hte Kabu Gara Shiga ka ai Kasa Yawhan a hpang hkan tai wa ai.

A.D (177) ning hta Gaul (Fransik Mungdan) kata zingri shamyit ai lam ni byin wa ai shaloi, Lyons mare na San Pra ai Saradaw Pothius sat kau hkrum lai wa ai raitim, Jau Irenaeus gaw, dai aten Roma de sa nga ang ai majaw, sat kau n hkrum ai. Dai zawn rai zingri shatsang ai lam ni zim mat wa ai shaloi, Jau Irenaeus gaw, Fransik mungdan de bai du wa ai. Mung masha ni gaw, yawng myit mang langai sha hte shi hpe Lyons mare na Saradaw lit dang da ya ma ai.

Saradaw Irenaeus gaw, shi gun ang ai lit hte maren, Sagurem Kaja tai nna makau mayang na mungdan hkan mung Kabu Gara Shiga chyam bra wa hkra shakut lai wa sai. Shi a mying Irenaeus gaw, “Simsa lam shabyin ai wa” (Peacemaker) nga ai hte maren, ndang kalang hkat ai mang hkang ni law law hpe shazim myit jahkrum kau ya lu sai.

A.D (190) ning hta Saradaw Irenaeus gaw, Paska Poi “Easter Poi” Lamang hpe Yuda ni a shalai wa ai nhtoi “Jewish Passover” shani galaw ai majaw, Nawku Hpung kawn nna shapraw kau hkrum ai Asia Minor mungdan na, Hkristan ni hte Wa Sarabyin Victor (3) a lapran na mang hkang hpe shazim kau ya lai wa sai rai nga ai.

Shi gaw, Gnostic hte Valentinian ni a shut ai masa hpe tara hkaw nna mung, laika buk ka nna mung ning hkap lai wa sai rai nga ai. Shi ka ai laika buk “Againt Heresies hte Proof of the Apostolic Preaching” (Tara shut ai ni hte N htan Shai ai Laika, Kasa ni a Tengman ai Sharin Shaga Hkrang) nga ai laika hku nna shut shai ai tara ni hpe si mani ai ladat hte sharin ya kau da sai.

Saradaw Irenaeus gaw, A.D (202) ning shaloi, Septimus Severus kawn Nawku Hpung hpe zingri shamyit ai shaloi, makam masham a matu, asak jaw si hkam lai wa sai rai nga ai.

Saradaw Irenaeus n nga mat ai hpang Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (28) ya shani masat shagrau dat ya sai rai nga ai.

Daini Nawku Hpung gaw, San Pra ai Irenaeus a Poi Nhtoi hpe galaw nga ga ai aten hta, anhte a hpung masha ni mung, tinang a makau grup yin, htingbu htingbyen ni a matu, simsa lam hpe gun sa ya ai ni, simsa lam hpe shabyin ya ai hkristan hpung masha ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)