Siena Mare na San Pra ai Bernadine a Poi Nhtoi (May 20) 20 May 2023

Siena Mare na San Pra ai Bernadine a Poi Nhtoi (May 20)

Siena Mare na San Pra ai Bernadine hpe “Chyoi Pra ai Yesu a Mying Kasa Wa” (Shing n rai) Apostle of the Jesus ngu nna masat shakawn shagrau nga ga ai re. Shi gaw, lai wa sai 1380 ning, September shata (8) ya shani, Italy Mungdan, Siena Ginwang, Massa Marittima mare kaw shangai chyinghkai wa ai rai nga ai. Ma kaji aten kaw nna Kanu yan Kawa n nga mat ai majaw, shi hpe Kanu Bawk kawn Karai Kasang hpe tsawra hkungga ai lam sharin shapan ya hpang wa ai.

Bernadine asak (17) ning du ai shaloi, machyi masha ni hpe laksan yu gawn lajang ya ai, Confraternity of Our Lady (Shing n rai) Hkawnsek Nu Maria a Myitrum Magam Gun Wuhpung de shang mat wa ai. Dai hpang sanit ning na ai shaloi, Siena mare makau kaw na Hkansa Tara Ja ai Franciscan Magam Gun Wuhpung “Franciscan of the Strict Observance” kaw shang nhtawm Jau tai Sacramentu hpe hkam la lu nu ai. Dai hpang (12) ning tup hpaji sharin hkaja la nhtawm, akyu hpyi myit sumru yu nna nga lai wa nu ai.

Dai hpang, shi a Jau Kaba ni gaw, Italy Mungdan ting kaw tara hkaw hkawm na matu shi hpe shatsam ya masai. Shi gaw, ga shaga atsam marai shaman chyeju lu ai re majaw, masha wuhpung law law hpe tang du hkra hkaw matsun ya lu nga ai. Jau Bernadine gaw, shi tara hkaw ngut shagu shawa masha ni hpe “I.H.S” ngu nna lungpa kaw ka tawn ai ga si masum hte shaman ya ya re ai. I.H.S a lachyum gaw, “Jesus Hominum Salvator” (Shing n rai) Yesu Shinggyim Masha ni a Hkye La Madu” ngu ai rai nga ai.

Kalang mi na, Bologna mare kaw shi tara hkaw ai grai tang du ai majaw, du sa ai shawa masha ni gaw, shanhte hpai da da yang lang ai mai sau ni yawng shawa a man kaw wan mang galaw nna nat kau ma ai. Shaloi dai hpai maisau ni galaw shapraw ai wa gaw, amu n tai mat ai majaw mara shagun ai lam byin pru wa sai. Shaloi San Pra ai Jau Bernadine gaw, shi hpe Yesu a Chyoi Pra ai Mying shalawm nna lungpa ni galaw dut na matu matsun wu ai. Shi matsun ai hte maren, dai hpai maisau pa dut ai wa hkan galaw ai majaw, grai lusu mat wa nu ai.

San Pra ai Bernadine gaw, 1444 ning, May shata (20) ya shani, Madu hta yup pyaw ban sa mat wa sai rai nga ai. Shi n nga mat ai (6) ning na ai hpang, 1450 ning, May shata (24) ya shani, dai aten na Wa Sarabyin Nicholas (V) kawn shi hpe, San Pra ai masha dang dat let, shi Poi Nhtoi hpe mung, May Shata (20) ya shani masat shagrau dat ya sai rai nga ai.

Daini Nawku Hpung gaw, San Pra ai Jau Bernadine a Poi Nhtoi hpe galaw nga ga ai aten hta, anhte Hpung Masha ni mung, Wa Jau Bernadine zawn, tinang hpe Karai Kasang Wa jaw ya sai, hkam la lu sai shaman chyeju ni hpe atsawm sha manu shadan jai lang chye ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)