Mons Mare na San Pra ai Waltrude a Poi Nhtoi (April 9) 09 April 2023

Mons Mare na San Pra ai Waltrude a Poi Nhtoi (April 9)

Mons Mare na, San Pra ai Waltrude gaw, tsaban (7) hta, Belgium Mungdan kaw shangai chyinghkai wa ai rai nga ai. Shi a chyinghkai Kanu yan Kawa hpe mung, San Pra ai Masha ngu masat shagrau da ai yan rai nga ma ai. Waltrude gaw, grai tsawm htam ai shayi sha re ai majaw, sak ram ramma shadang sha ni law law shi hpe hkung ran la na matu myit katu lai wa ma ai. Raitimung, shi a Kawa Hkawhkam Chlotar (2) kawn shi a matu ning rum ningtau tam ya wu ai.

Waltrude gaw, Hkawhkam Dagobert a Tararung magam gun, San Pra ai Vincent Madelgaire hte kun dinghku de wu ai. Shanhte gaw, la kasha lahkawng num kasha lahkawng lu ma ai. Mau hpa gaw, shanhte yawng hpe San Pra ai Masha ni ngu nna pyi shakawn shagrau hkrum ma ai. Karai Kasang Wa gaw, mau hpa Kun Dinghku hpe jaw ya ai majaw, Waltrude grai kabu wu ai. Shi gaw, Madu wa hpe Tawra Jau byin na matu n gun jaw ai hte maren San Pra ai Vicent Madelgaire ngu masha law malawng chye ma ai. Waltrude gaw, Shi a ning rum ning tau wa Tawra Jau byin mat ai (2) ning na ai hpang, shi mung Mama tai na matu myit daw dan kau wu ai. 

San Pra ai Waltrude gaw, Belgium Mungdan, Mons Mare hta Karai Magam Gun Wuhpung hpe gaw de lai wa sai raitimung, dinghta shinggan masha ni a tsun mara shagun ai lam hpe tawt lai lu na matu, Wuhpung Shang Masha Langai hku nna nga lai wa sai. Shinggan masha ni a ningmu hta mung, (San Pra ai Waltrude gaw, Shi a mara ni hpe makoi magap na matu, akyu hpyi hte mai kaja ai lam ni hpe galaw ai rai nga ai, nga nna myit sawn la ma ai.

San Pra ai Waltrude gaw, Madu a shaning 688 ning, April shata (9) ya shani Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, Shi hpe  San Pra ai masha dang dat let, Shi a Poi Nhtoi hpe mung, April shata (9) ya shani ngu masat shagrau dat ya sai rai nga ai.

Daini Nawku gaw, Mons Mare na San Pra ai Waltrude a Poi hpe galaw nga ai aten hta, anhte marai hkum shagu mung, tinang kun dinghku dum  nta masha ni a matu, Karai Wa a Mungga hpe bai ginlen ya lu ai ni, Kung dinghku a matu Nhtoi hpe shaleng ya lu ai ni byin tai lu hkra shakut sa wa ga ngu, n gun jaw dat lu nngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)