San Pra ai Sarabyin Leo (IX) 9,  a Poi Nhtoi (April 19) 19 April 2023

San Pra ai Sarabyin Leo (IX) 9,  a Poi Nhtoi (April 19)

San Pra ai Leo gaw, Nawku Hpung Kata gram galai ra ai mang hkang ni law law nga ai aten hta sak hkrung ngai lai wa sai rai nga ai. Shi gaw, Italy Mungdan, Alse mare kaw lai wa sai 1002 ning, June shata (21) ya shani, shangai chyinghkai wa ai rai nga ai. Shi a kashin kamun mying gaw, Bruno rai nga ai.

Shi gaw, Deacon aya hkam la ngut nna, 1026 ning hta Italy mugndan majan man kaw Hkawhkam Conrad (II) a hpyen hpung hpe woi ningbaw lai wa sai. Simsa wa ai hpang, shi gaw, Saradaw lit shatsam ya ai hpe hkrum sai. Shi a Saradaw ginwang kaw shi yu gawn ai (20) ning laman Jau ni hte seng ai galai shai lam ni hte Tawra ni hte seng ai gram ra ai Cluniac ni hpe awng dang hkra woi galaw ya lai wa sai.

1049 ning hta Sarabyin Damsus (II) nnga mat ai majaw, Saradaw Bruno gaw, Sarabyin Leo (IX) byin tai wa sai. Dai aten hta shi a asak gaw, (47) ning sha naw rai nga ai. Shi gaw, shi woi awn hpang tawn ai gram lajang ai lam ni hpe ta tut hkan shatup galaw nga ai hpe chye lu na matu Uropa dan na mungdan shagu de dau gawan jep sagawn lai wa ai. Dai majaw, shi hpe “Nawku garan hkrun lam pru ai kasa magam gun” (Apostolic Pilgrim) ngu nna shamying ma ai.

Shi woi awn da ai gram lajang ai amu langai mi gaw, Sarabyin tai na wa hpe Cardinal Saradaw Kaba ni chyu sha lata masat ai lam rai nga ai. Ndai gram lajang ai ladat hpe shi n nga mat ai hpang (5) ning kaw nna hkan galaw hpang sai rai nga ai. Sarabyin Leo (IX) gaw, 1054 ning, April shata (19) ya shani, Shi a asak (52) ning hta Madu kaw yup pyaw ban sa mat wa sai rai nga ai.

Shi n nga mat ai hpang, 1082 ning hta, dai aten na, Sarabyin Gregory (VII) kawn San Pra ai Masha dang dat nna, shi a Poi Nhtoi hpe mung, April shta (19) ya shani ngu masat shagrau dat ya sai rai nga ai.

Daini San Pra ai Sarabyin Leo (IX) a Poi Nhtoi hpe galaw nga ga ai aten hta, anhte hpung masha ni marai hkum shagu mung, tinang kaning re ai prat de du mat ai raitim, Karai Wa a shaga la ai lam hpe galoi mung hkan shatup lu na atsam hpe lu la na matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)