Braga Mare na San Pra ai Fructuosus a Poi Nhtoi (April 16) 16 April 2023

Braga Mare na San Pra ai Fructuosus a Poi Nhtoi (April 16)

San Pra ai Fructuosus gaw, Spain Mungdan na hpyen magam gun kanu yan kawa kaw na tsa ban (7) hta shangai chyinghkai wa ai rai nga ai. Shi a Kanu yan Kawa gaw, shi naw kaji ai aten hta n nga mat sai rai nga ai. Shi gaw, kaji ai aten kaw na, Karai Magam gun tai mayu nga nu ai. Shi a Kanu yan Kawa kaw na lu la ai ja sutgan ni hpe mung, matsan mayan re ai ni hpe garum jaw ya ai.

Shi gaw, Tawra Jau Jawng law law hpe mung gap kau da sai rai nga ai. Masha hte tsan gang ai nam maling kata de tara shadik nna sa nga mat tim, shi a san seng san pra ai myit jasat shiga a majaw, masha law law shi hpang de sa du wa ma ai. Shi kaw du ai num sha ma ni a matu, Mama jawng ni gap ya nna, shanhte hpe San Pra ai Benedict masat da ya ai hkan sa tara ni hte woi nga ai; laika hpaji alak mi sharin ya ai hte nawku magam hpe jahkum nna woi shatup galaw lai wa sai.
San Pra ai Jau Fructuosus gaw, asim sha tara shadik let nga mayu ai majaw, Ijip Mungdan de sa nga na lajang wu ai. Raitimung, mungdan a hkawhkam n hkraw wu ai. Shi hpe Portugal mungdan, Dumium mare na Saradaw, dai hpang Braga mare na Saradaw kaba aya ni tang da ya hkrum sai. Dai shara kaw du ai shaloi, dai yang na masha ni a dingbai dingna jaw hkrum wu ai. Raitimung, shi gaw, akyu hpyi shaja ai myit hte shakut shaja ai atsam ni a majaw, angwi apyaw sha shanhte hpe lu zinlum la lu sai rai nga ai.

San Pra ai Saradaw Fructuosus gaw, A.D 665 ning, April shata (16) ya shani hta, Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, San Pra ai masha dang dat let, Shi a Poi Nhtoi hpe mung, April shata (16) ya shani masat shagrau dat ya sai rai nga ai.
Daini Nawku hpung gaw, San Pra ai Jau Fructuosus a Poi Nhtoi hpe galaw nga ai hte maren, anhte Hkistan makam masham hpe hkap la da lu sai marai hkum shagu hta mung, Madu a Kabu Gara Mungga hpe hkaw tsun sakse hkam lu ai ni tai wa lu hkra shakut hkawmsa lu na atsam lak san hpyi la nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)