San Pra ai Jon Baptist De La Salle a Poi NHtoi (April 7) 07 April 2023

San Pra ai Jon Baptist De La Salle a Poi NHtoi (April 7)

San Pra ai Jon Baptist De La Salle gaw, 1651 ning, April shata (30) ya shani, Fransik Mungdan, Rheims Mare kaw shangai chyinghkai wa ai rai nga ai.

Shi gaw – Brother of Christian School (FSC) shing n rai, “De La Selle Brother” Wuhpung hpe gaw de ai wa rai nga ai.

Madu a shaning, 1698 ning hta, England Mungdan na Hkawhkam James (II) a saw shaga ai majaw, Hkawhkam kasha ni hte lusu kasha ni a matu laika sharin jawng langai mi sa gap hpang da ya sai.

Dai hpang, bungi galaw sha ai ni a kashu kasha ni a matu mung, laika sharin jawng ni matut manoi hpaw da ya sai.

Shanhte a De La Selle Brother wuhpung gaw, Uropa Dan ting hta, Kahtawlik Laika Sharin jawng law law hpe hpaw ya nna, laika sharin ai lam hta kaba dik ai Brother Wuhpung byin tai wa sai.

Brother John Baptist gaw, ya na zawn, Karai a Magam hta shakut nga ai aten, 1719 ning, April (7) ya shani, Madu hta yup pyaw ban sa mat wa sai rai nga ai.

Shi n nga mat ai hpang, Madu a shaning 1888 ning, February shata (19) ya shani, dai aten na Wa Sarabyin Leo (13) kawn, Shi hpe A Lu ai Masha dang dat sai rai nga ai.

Dai hpang, 1900 ning, May shata (24) ya shani hta gaw, Wa Sarabyin Leo (13) sha, Shi hpe San Pra ai Masha dang dat let, Shi a Poi Nhtoi hpe mung, April shata (7) ya shani masat shagrau dat ya sai rai nga ai. 

Dai hta n-ga Madu a shaning, 1950 ning du ai shaloi, San Pra ai John Baptist hpe, Nawku Hpung kawn, “Laika sharin ya ai Sara ni alak mi kamhpa lu ai San Pra ai Masha” hku nna masat shagrau dat ya sai rai nga ai.

Daini Nawku gaw, Brother John Baptist a Poi hpe galaw nga ai aten hta, anhte marai hkum shagu mung, Brother John Baptist zawn, tinang chye da ai hpaji machye machyang ni hpe ra kadawn nga ai ramma kashu kasha ni hpe bai gam garan ya lu ai ni byin tai lu hkra, shakut sa wa ga ngu, n gun jaw dat lu n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)