Seville Mare na, San Pra ai Isidore a Poi Nhtoi (April 4) 04 April 2023

Seville Mare na, San Pra ai Isidore a Poi Nhtoi (April 4)

San Pra ai Isidore gaw, Madu a shaning (560) ning hta Spain Mungdan Cartage mare kaw shangai chyinghkai wa ai rai nga ai. Shi hpe n dam hkawm na matu Kahpu kawn gawk kaw chyinghka la shingdang da nna sharin shaman ya ai majaw, shi gaw, dai aten na hpaji kung zet dik htum ai masha tai wa sai rai nga ai.

San Pra ai Isidore gaw, lai wa sai, February shata (27) ya shani Poi Nhtoi ang ai Kanau San Pra ai Leander a Kahpu mung rai nga ai. Dai hta n-ga, shannau ni hta na, Saradaw Fulgentius hte Florentina yan mung, San Pra ai Masha yan rai nga ai. Dai majaw, shannau ni gaw, kasi la mai ai San Pra ai yan nau ni rai nga ai.

San Pra ai Isidore gaw, Madu a shaning (600) ning mayan hkan, Saradaw tai wa ai shaloi, Arian a shut shai ai tara kaw nna Visigoths amyu sha ni hpe makam masham ajet de myit malai let galai shang wa na matu grai garum jaw ya lai wa sai. Bai nna, madu a shaning 633 ning hta galaw ai Mali lang ngu na Toledo Nawku Hpung a Zuphpawng kaba “Fourth Council of Toledo” hpe woi awn ya lai wa sai. Ndai zuphpawng kaba kaw nna Nawku Dawjau Lamang hte seng ai Hkrang “Liturgical Pratice” hte Saradaw ginwang na Hpung Laika Sharin jawng ni hpe shagrin masat da lu sai rai nga ai. Shi a majaw, kaga Uropa dan na Mungdan ni gaw, masha shazai ni a sat lawat hkan mat ma timung, Spain Mungdan gaw, htung lai kaja ni hpe makawp maga da lu sai.

San Pra ai Isidore gaw, laika ka Sara, Writer mung rai nga ai. Shi ka da ai laika ni kaw na, “Etymologies” ngu ai hpaji magup hte kapyawn nna ka da ai laika mung lawm nga ai. Dai laika gaw, dai aten hpaji sharin nga ai jawngma ni madung tawn nna kam shamyet lu ai laika langai mi tai wa sai. “Three Books of Sentences” ngu ai laika buk gaw, Hkristan sharin shaga lam hte sak hkrung nga sa lam hte seng ai laika mung rai nga ai.

San Pra ai Isidore a laika buk langai mi kaw, “Akyu hpyi ai lam gaw, anhte a wenyi myit masin salum hpe shachyoi shapra ya ai; laika hti ai lam gaw, anhte myit masin hpe sharin achyin ya ai. Mai byin jang, dai ladat lahkawng yan kaja ai hkrai rai nga ai; raitimung n mai byin yang gaw, akyu hpyi ai lam gaw, laika hti ai lam hta grau kaja ai.” nga nna ka tsun da nga ai.

San Pra ai Isidore gaw, shi a prat tup shagrit shaenm let san seng san pra lam hpe madung tawn nna amu galaw nhtawm sak hkrung nga lai wa sai. Shi garai n si ai shata kru laman hta shi gaw, alak mi matsan ai ni hpe gam garan jaw ai amu magam galaw lai wa sai. Shi a jawng wang kaw jahpawt nhtoi htoi ai kawn nsin sin ai du hkra matsan masha ni a garum sa hpyi ai shara tai wa sai.

San Pra ai Isidore gaw, Madu a shaning (636) ning, April shata praw (4) ya shani, Nam Man Chya Sacramentu hkam la ngut ai hpang, shi hpe hka kap ai ni yawng hpe hka bai n wa ra ai shaprai kau ya nhtawm, shi lu malu hpe gam jaw kau nu ai. Dai hpang shi gaw, angwi apyaw hte sha Madu kaw yup pyaw ban sa mat wa sai rai nga ai. 

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, April shata praw (4) ya shani masat shagrau dat ya sai rai nga ai.

Daini Nawku Hpung gaw, Seville Mare na, San Pra ai Isidore a Poi Nhtoi hpe galaw nga ga ai aten hta, anhte marai hkum shagu mung, San Pra ai Isidore zawn, anhte a sak prat hkrun lam hta mung, tinang lu ai ja sut gan arung arai ni hpe tinang a matu sha n rai, yak hkak jam jau hkrum nga ai makau grup yin hkan na kahpu kanau ni a matu atsawm sha akyu jashawn jai lang chye ai ni byin tai lu hkra, shakut sa wa ga ngu, n gun jaw gam garan ya dat lu n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

Video Link: https://www.youtube.com/watch?v=ntcujhutJ9c