Armagh Mare na, San Pra ai Cellach a Poi Nhtoi (April 1) 01 April 2023

Armagh Mare na, San Pra ai Cellach a Poi Nhtoi (April 1)

San Pra ai Cellach gaw, Ireland Mungdan kaw, lai wa sai A.D (1079) ning hta shangai chyinghkai wa ai rai nga ai. Shi a asak (26) sha naw rai yang, dai aten hta amyu hpan hkan nna galaw ai hkring htawng masing hte maren, Saradaw lit shatsam ya ai hkrum sai. Shi a sak hkrung prat tup hta gram sharai ai amu hte uphkang ai lit magam gun kaja langai mi tai let, nga lai wa sai rai nga ai.

San Pra ai Cellach gaw, Ireland Mungdan ting du hkrawm nna galai shai gram ra ai lam ni hpe galaw ya sai. Irish hkawhkam ni shada da a lapran na mang hkang ni hpe shazim ya ai. Jaw ai ladat hte Nawku Hpung kata na gram lajang ra ai magam hpe galaw ya ai majaw, masha ni law law kam shamyet ai hpe hkrum lai wa sai. Shi gaw, Rath Bresail mare kaw na, Saradaw ni a Zuphpawng “Synod of Rath Bresail” hpe woi awn galaw ya sai.

Dai Zuphpawng de Saradaw ni marai (30) du dung bawng ban daw dan lawm lai wa sai rai nga ai. Ndai zuphpawng gaw, Ireland Mungdan kaw na Kahtawlik Nawku Hpung hte Uropa dan na Kahtawlik Nawku Hpung a lapran rap ra lu ai zinlum lam galaw ya sai. Shi gaw, Armagh mare na, Saradaw Nawku Htingnu hpe mung gaw gap da ya lai wa sai.

San Pra ai Cellach gaw, gram lajang ai lam hta ningbaw atsam shaman chyeju lu la ai wa mung rai nga ai majaw, shawoi na htinggaw hkring htawng dagraw lai hpe galai kau sai. Shi a shara hta shi a htinggaw hpan kaw na n re ai sha, shi a ningtau “Arch-Deacon” San Pra ai Malahki hpe lit galai shatsam ya sai. Dai hpang, San Pra ai Malahki hpe Armagh mare na, Saradaw lit shatsam ya sai rai nga ai.

San Pra ai Cellach gaw, Madu a shaning 1129 ning, April shata (1) ya langai ya shani, shi a asak (50) ning du ai shaloi, Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, April shata praw (1) ya shani masat shagrau dat ya sai rai nga ai.

Daini Nawku Hpung gaw, Armagh Mare na, San Pra ai Cellach a Poi Nhtoi hpe galaw nga ga ai aten hta, anhte marai hkum shagu mung, San Pra ai Cellach zawn, tinang a dum nta masha ni, makau grup yin na manaw manang ni hpe lam kaja de woi lakawn ya lu ai ni byin tai lu hkra shakut sa wa ga ngu, n gun jaw dat lu nngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)