Syracuse Mare na San Pra ai Zosimus a Poi Nhtoi (March 30) 30 March 2023

Syracuse Mare na San Pra ai Zosimus a Poi Nhtoi (March 30)

San Pra ai Zosimus gaw, Italy Mungdan, Sicily Zunlaw na, Srikyus (Syracuse) Mare kaw, lai wa sai A.D (570) ning hta shangai chyinghkai wa ai rai nga ai. Shi a kanu yan kawa gaw, grai lusu ai hte lamu ga madu ni rai nga ma ai. Shi shangai wa ai aten kaw nna shi a kanu yan kawa gaw, shi hpe San Pra ai Lucy Tawra Jawng kaw, Karai Kasang hpe sa ap kau ya ma ai. Ma kaji ten kaw nan shi gaw, Tawra jawng hte grau hkau mat ai; asak sanit ning du ai shaloi, shi gaw, Tawra jawng kaw shi a asak sumshi du hkra sa nga mat ai.

Shi a chyoipra san seng ai hpu nau tsawra myit kaba ai lai len ni a majaw, dai San Pra ai Lucy jawng kaw na Tawra Jau kaba n nga mat ai hpang, shi a shara kaw Jau Zosimus hpe lit shatsam ya ma ai. Shi gaw, hpaji kung zet ai myit jasat ni a majaw, masha ni yawng shi hpe Syracuse mare na Saradaw kaba lit shatsam ya ma ai. Saradaw Zosimus gaw, shi yu lakawn nga ai Wuhpung a hkum hkrang hte Wenyi lam hte seng nna, shakut shaja bungli galaw gun hpai lai wa ai. San Pra ai Saradaw Zosimus gaw, A.D (660) ning, Shi a asak (90) ning du ai shaloi, Madu kaw yup pyaw ban san mat wa sai rai nga ai. 

Saradaw Zosimus n nga mat ai hpang, Nawku Hpung gaw, shi hpe San Pra ai masha dang dat let, shi a Poi Nhtoi hpe mung, March shata (30) ya shani masat shagrau galaw ya nga ai gaw, daini na aten du hkra rai nga ai.

Anhte hpung masha ni mung, Syracuse Mare na San Pra ai Saradaw Zosimus a labau kadun hpe hti hkaja la let, anhte hkum nan a matu mung, kashu kasha ni a matu mung, wenyi makam masham lam hte seng nna, galoi aten hta raitim, hkaja matsing sumhting lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)