Anhte Yawng Gaw Kasa Ni Tai Na Matu Shaga La Hkrum Ga Ai Nga Nna Wa Sarabyin Tsun

March 15, bat masum ya shani, Wa Sarabyin Francis, Hpung Shawa masha ni hte hkrum shaga lamang hta, Hkristan ni: Jau,Sasana  Ma Ma, Brather ni hte hpung masha ni yawng gaw sasana galaw ai sapen ni tai nga na matu saga la hkrum sa ga ai re, nga nna tsun shadum da ai.Ndai sharin shaga ai lam gaw Ga Shaka Ningnan Chyum Laika hta hpe mahta nna, Vatican II Council hpawng sharin shaga ai lam rai nga ai.

"Kasa" ngu ai gaw hpa rai ta? "Kasa" ngu ai gaw shangun dat na matu rai nga ai. Hkrung rawt sai Hkristu gaw kasa ni hpe mungkan shara shagu de shangun dat ai hpe Yh 20:21 hta mu lu ga ai."Kawa Karai Kasang, ngai hpe shangun dat made ai zawn, ngai mung nanhte hpe shangun dat made ai." (Yh 20: 21)"Kasa" ngu ai gaw alak mi rai shaga la hkrum ai rai nga ai.

"Dai hpang Yesu gaw bum langai de lung wa nna shi kaw hkan nang mayu ai ni hpe mung shi saw shaga mu ai rai nna shanhte shi kaw sa du ma ai." (Mk 3:13)Yesu, shi myit ra ai ni hpe, shi kaw sa na matu shaga la ai rai nna, shanhte mung shi kaw sa du ma ai lam rai nga ai."Karai Kasang a myit ra ai hte maren, Hkristu Yesu a Kasa aya hta dang da hkrum ai ngai Pawlu hte hpu nau kaga ni mung nga ai hpe San Pawlu sakse hkam da ai hpe 1Kor 1:1 hta mu lu ga ai.

San Pawlu gaw Hkristu Yesu a shangun ma tai na matu shaga la hkrum ai lam, Dai gaw shi hpe Yesu a "Kasa" shatai na matu re ai lam Rm 1:1 hta San Pawlu sakse hkam da ai hpe mung mu lu ga ai.Saw shaga hkrum ga ai hpe hkap la ra ai lam Wa Sarabyin Francis matut shadum sharin shaga da ai.Hkristan ni tai ai gaw kasa ni tai na matu shaga la hkrum ai rai nga ai. Kamsham ai masha: num, la yawng gaw Hkristu a "kasa" ni tai na matu, namman sau chya da hkrum saga ai.

Ndai gaw ahkyak ai, Jau prat hku lata shaga la hkrum ai gaw, kamsham ai hpung masha ni hte jahka kau ai n re ai, Hkristan ni yawng gaw yawng a matu daw jau na saw shaga la hkrum ga ai rai nga ai, nga nna Wa Sarabyin Francis sang lang da ai.Jau prat hku nna, tara shang masa hte, nawku daw jau magam hta woi awn ai lam ni gaw sharin shga, shachyoi shapra, hpa-awn tai, hparan lai wa ai kasa ni a ahkang aya hpe lahpa galai gun hpai ai lam sha rai nga ai; kam sham ai hpung masha ni mung Jau ni a magam lit ni hpe shingdep shingtau tai gun hpai lawm lu ra ai, nga nna Wa Sarabyin Francis matut sang lang da ai.

Kawa, Kasha, Chyoi Pra ai Wenyi a mying ningsang hta, Namman chya kashin kamun hkam la sai kamsham ai masha yawng gaw Hkristu a "Hkingjawng aya, Myihtoi aya, Hkawhkam aya" hpe hkam la lu sai rai nga ai."Hierarchy" ngu ai tsang hte tsang up hkang, lit gun hpai ai ni hte hpung masha ni lapran magam rum, rau gun hpai ai hkrang masa rai ra ai. Ndai masa hta n hkawm shi ga ai rai yang, Nawku Hpung gaw Hkristu a hkrum tsup, hpring tsup hkrang kumla n tai shi ai lam Ad gentes 21 hta sharin shaga da ai hpe mung Wa Sarabyin Francis sang lang da ai.

"Nawku Hpung kata, kadai wa grau ahkyak a ta? Saradaw i?, Jau i?, n re ai, anhte Hkristan ni yawng gaw shada daw jau nga ra ai, yawng gaw maren mara sha re ai, anhte yanng maren sha re ai," nga nna Wa Sarabyin sharin shaga da ai.Hpang jahtum hta, Argenina mung masa, Ukraine mung masa lam ni hte seng nna, Spain ga hte shadum ga tsun da ai.

Mungdan a ningbaw ningla ni, mung masa wuhpung ni, shinggyim wuhpung ningbaw ni, ngai a Sarabyin prat (10) ning ladu hkrum masat dingsat hta nanhte sa du hkrum shaga ai gaw grai kaja ai kumla rai nga ai, ngu tsun let, mungdan galu kaba lam hte seng nna bawng ban jahkrup sa wa na hpe mung hpyi shawn mayu ai lam hte makam hpung ni hpe mung hkungga manu shadan na lam, Wa Sarabyin Francis, tsun shadum da nga ai.

By Fr. Patrick Gamaw Hkawng Yae

#vaticannews

#rvakachinservice

https://www.vaticannews.va/en/pope/news/2023-03/pope-at-audience-all-called-to-be-apostles.html