Wa Sarabyin: Myi Hpaw Da Ga, Karai Kasang A Chyeju Kumhpa Hpe Mu, Mau, Kabu Lu Na

March 19, laban shani, San Peter Shawa Pa kaw sa du hpawng de ai buhkawm akyu hpyi masha ni hpe, Wa Sarabyin Francis, dai shani hti ang ai Ja Chyum Mungga hpe lakap nna, anhte a myi hpe hpaw da ga, shaloi, Karai Kasang a chyeju kumhpa ni hpe mu, mau kabu lu na ga ai, nga nna tsun shana da nga ai.Kabu Gara Shiga gaw, kanu a hkritung kaw nna, myi n mu ai masha hpe myi shamu ya ai lam rai nga ai.

Ndai mau hpa lamik kumla a majaw masha ni a lapran ningmu ni, tsun kajai ai lam ni law law byin pru wa ai. Karai Kasang a chyeju hpe, hkap kalum tau la chye ai masin salum, n lum n tsi re ai masin salum, hkrit tsang ai masin salum, magrau grang share shagan re ai masin salum amyu myu hte bai htang ma ai: langai hte langai hkam la ai myit masa n bung ma ai.

Nkau mi gaw Yesu myi shamu dat ya ai wa kanu a hkritung kaw nna myi n mu ai re lam hpe n kam ma ai; shi a kanu kawa yan teng man ai lam hpe tsun shapraw dat ai ga a majaw makam hpung woi ni myit kahta ma ai, myit htum ma ai, myit tsang ma ai.Bung ma ai lam langai gaw dai mau hpa lamik kumla a lam na lu ai ni yawng a masin salum hta Yesu Madu a lam myit aru ma ai rai nga ai. Raitimung, nkau ni gaw hkrit tsang myit ka-up da ai majaw dai mau hpa chyeju kumhpa hpe n hkap la lu ma ai.

"Shawng de ngai myi n mu lu ai, ya gaw mu lu se ai."Kanu a hkritung kaw nna myi n mu ai wa myi mu lu ai hpang shi hpe myi shamu ya ai a lam sakse hkam ai; byin lai wa sai lam yawng atsin ayang tsun hpaw dan ai; mau ai hte, kabu ai hte, chyeju dum ai hte tsun hpaw let sakse hkam ai.Hkum hkrang myit masin yawng shalawt dat hkrum ai wa zawn, Yesu Madu a lam, n hkrit n tsang ai hte, sakse hkam ai.

Shamai shatsai hkrum ai hpang hkrit tsang ai lam n nga nu ai; chyeju dum let sakse hkam sa wa ai. Yesu Madu, dai masha hpe hpring tsup ai sari sadawng hte jahpring ya ai majaw rai nga ai; laban n'htoi shani, shawa law law a man hta, Yesu Madu shi hpe shalawt dat ya ai; mabyin lam ni hpe san jep shagawn ai lam hpa n galaw ai sha, shi a myi shamu dat ai. Dai masha mung myi mu ai hte rau dai byin wa ai lam yawng sakse hkam ai.

Nanhte gaw gara hku bai htang na rai mi ta?Karai Kasang a chyeju kumhpa hte anhte hpe, shani shagu, mau kabu shangun ai lam ni hpe dum shai nga ga; yak hkak jam jau ten hta raitim, Yesu Madu, myi kyaw ai wa hpe zawn, anhte hpe mung mai kaja lam jaw ya nga ai hpe myit dum ga ngu tsun shadum da ai.Kanu Nu Maria hte San Yawseph gaw, anhte hpe sadi dung makam rawng ai ni tai nga lu na, akyu hpyi htinglu htinglai ya u ga, ngu nna akyu hpyi let mungga hpe ginchyum dat shangut da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2023-03/pope-open-your-eyes-and-be-surprised-by-god-s-gifts.html