Saint Turibius of Mogrovejo (March 23) 23 March 2023

Saint Turibius of Mogrovejo (March 23)

Mogravejo Mare na, San Pra ai Turibisu gaw, Spain mugndan, Majorca mare kaw e, lai wa sai 1538 ning, November shata (16) ya shani hta shangai chyinghkai wa ai rai nga ai. Shi gaw, jawngma prat aten kaw na hpaji hte myit mang ai lam hta grai ningtawn ai majaw, Salamanca Dakkasu kaw na Hkansa Tara hte seng ai hpaji ninghkring Sara lit (Professor of Law) hte Granada mung na, Tara Jeyang ai rung kaw na ningbaw ngu ai (President of the Court of Inquisition at Granada) lit hte Peru mung, Lima mare kaw na Saradaw lit ni shatsam ya hkrum lai wa sai rai nga ai.

Shi a lima Saradaw ginwang ting hpe (25) ning tup yu gawan katsan lai wa sai. Ladu shalai jan ja prang, nam dusat hte hkrit tsang ra ai lam hte buga masha shazai nkau hpe hkrit ra ai lapran hta n sim nsa Hpung Gawan hkawm lai wa ai. Shi gaw, dai shara kaw nga ai Indian amyu sha ni a ga hpe mung shakut nna sharin la lu ai majaw, shi a makam masham hkaw shabra ai lam grai awng dang wa ai hte Jau ni a nga sat nga sa lam hpe mung, shading sharai ya lu nu ai. Shi gaw, Indian amyu sha mun kaba jan hpe mung, Kashin Kamun Sacramnetu jaw kau da ya sai rai nga ai. Ndai Indian amyu sha ni a ahkaw ahkang hpe, Spain up hkang du ni kaw na shi makawp amga da ya lu sai. Chyoi pra san seng ai Jau ni lu na matu ahkyak kaba re ai hpe shi hkap la ai. Dai majaw, American Indian ni nga ai ndai Lima mare kaw shawng nnan na Jau Tai jawng langa mi hpe gap da ya sai.

San Pra ai Saradaw Turibius gaw, Lima mare kaw na San Pra ai Rose (St. Rose of Lima) a jinghku mu rai, shi a N gun shaja jaw ai Saradaw mung rai nga ai. Ndai zawn sasana magam bungli ni hpe gun hpai shakut shaja nga ai aten, 1606 ning, March shata (23) ya shani hta, Madu kaw yup pyaw ban sa mat wa sai rai nga ai.

Shi n nga mat ai hpang, 1679 ning, July shata praw (2) ya shani hta, dai aten na, Wa Sarabyin Innocent (XI) gaw, shi hpe A Lu ai masha hku nna masat shagrau dat sai rai nga ai.

Dai hpang, 1726 ning, December shata (10) ya shani hta gaw, dai aten na, Wa Sarabyin Benedict (XIII) kawn shi hpe San Pra ai masha dang dat let, shi a Poi Nhtoi hpe mung, March shata (23) ya shani masat shagrau dat ya sai rai nga ai.

Daini Nawku hpung gaw, Mogrovejo mare na, San Pra ai Turibius a Poi Nhtoi hpe galaw nga ai hte maren, anhte a sak prat hkrun lam hta mung, tinang galaw lu ai atsam marai nga ai daram, lit ang ai magam ni hpe gun hpai nna, dinghta shing gyim wuhpung wuhpawng a matu hte Karai Wa a mungdan gaw dap ai lam hta shang lawm lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)