San Pra Ai Deogratias A Poi Nhtoi (March 22) 22 March 2023

Saint Deogratias (March 22)

San Pra ai Deogratias gaw, Africa Mungdan, Carthage mare na Jau langai mi rai nga ai. Dai buga gaw, dai aten hta Spain, Roma mungdan ni hte rau Vandal ngu mying ai German amyu sha ni jawm kashun mazing la hkrum ai shara ni rai nga ai. Ndai Carthage mare gaw, Vandal ni kawn gasat zing la hkrum nna Saradaw Quodvultdeus hprawng yen mat ra ai hpang (14) ning tup Saradaw n nga mat ai. Raitimung, hpang de Vandal hkawhkam Generic gaw, Saradaw langai mi bai shatai nna nga na ahkang jaw ya sai.

San Pra ai Deogratias hpe tara maigan ni hte shut shai tara lang ai Arian hpung shang ni grai hkungga ma ai. Dai majaw, shi Saradaw tai wa sai. Raitimung, African mungdan na mayan ni hpe bai lu hkye na matu shakut ai majaw, Arian hpung shang ni shi hpe sat kau na gyam wa ma ai. Dai zawn rai ayak ahkak lapran shi masum ning tup lit magam gun hpai kau da ai.

Dai laman dut kau hkrum ai masha ni hpe hkyen la lu na matu hte shanhte a matu nga na ginra lu gap hkra nga nna shi lu malu yawng dut kau ai. Saradaw Deogratias a matu gaw, Carthage mare kaw na Nawku Jawng Kaba lahkawng kaw lu hkye tawn sai mayam ni hpe nga shangun na matu yaw shada ai. Dai majaw, Aria hpung shang ni Saradaw hpe grau n ju n dawng rai wa ma ai.

Arian hpung masha ni a n shawp n kap ai lam hpe n matang ai sha, shi a magam lit hpe ding yang galaw kau da n htawm, A.D 457 ning hta, Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, shi hpe e San Pra ai masha dang dat let, Shi a Poi Nhtoi hpe mung, March shata (22) ya shani masat shagrau ya ai gaw, daini du hkra rai nga ai.

Anhte hpung masha ni mung, San Pra ai Saradaw Deogratias a labau kadun hpe hti hkaja la nna, anhte a makau grup yin hta tsin yam hkrum sha nga ai ni, hkye mawoi na matu ra ahkyak taw nga ai ni hpe dang dep ai daram hkye mawai magam lam ni hta shang lawm lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyna)