San Pra AI Nicholas of Flue A Poi Nhtoi (March 21) 21 March 2023

Saint Nicholas of Flue (March 21)

San Pra ai Nicholas gaw, lai wa sai 1417 ning hta, Switzerland mungdan, Unterwalden Saradaw Ginwang, Lucerne mare (Lake of Lucerne) kaw, shangai chyinghkai wa ai rai nga ai. Shi hpe Switzerland mungdan kaw na Protestant (Kahtawlik Nawku Hpung kawn Hpung kaga de garan mat wa ai hpung) masha ni hkungga “Honored” ya ai zawn, shi hpe Kahtawlik Nawku Hpung gaw Hkungga shagrau ai “Venerated” nga ai rai nga ai.

Yi sun hkauna galaw ai la langai mi a kasha hte kun dinghku de nna kashu kasha marai (10) lu ma ai. Shi gaw, dinghku la, ma kawa, bungli galaw sha ai masha, hpyen hpung ningbaw, uphkang wuhpung shang langai, Tara agyi malawm langai mi rai nna, lai akyang myit jasat kaja ai hte seng nna ra n rawng ai wa mung rai nga ai. Akyu hpyi shaja ai, makam masham lam myit sumru yu ai, lusha gam akyu hpyi nna aten shama chye ai wa rai nga ai.

Shi gaw, dinghku prat (20) ning du ai shaloi, Karai Kasang a shaga ai n sen hpe hkap la ai; shi a madu jan myit hkrum ahkang jaw ai majaw, mungkan a ja sut gan ni hpe shi a n rum ntau jan, kasha ni hpe ap kau da n htawm, tawra jawng de tara shadik let sa nga mat ai. Shi gaw, tawra jawng kaw (19) ning tup malu masha hpa mung n lu sha ai, Chyoi Pra ai hkum sha hkam nna ngai lai wa sai. Masha law law gaw, shi kaw nna hpaji sa hpyi la ma ai.

1481 ning, Switzerland uphkang salang ni a lapran myit n hkrum ai mang hkang byin wa sai. San Pra ai Nicholas shadum jahprang let hpaji jaw ai majaw, mang hkang kaba dai angwi apyaw sha ngut mat nna shada myit hkrum myit ra lam bai lu la ma ai.

1487 ning, March shata (21) ya shani, San Pra ai Nicholas gaw, shi a asak (70) ning hta madu jan hte kasha ni a lata hta, Madu kaw yup pyaw mat wa sai rai nga ai.

Shi n nga mat ai hpang, shi hpe e, 1669 ning hta A Lu ai masha hku nna masat shagrau dat let, 1947 nng hta gaw, dai aten na Wa Sarabyin Pius (XII) kawn San Pra ai masha dang dat let, Shi a Poi Nhtoi hpe mung, March shata (21) ya shani masat shagrau dat ya sai rai nga ai.

Anhte hpung masha ni mung, San Pra ai Nicholas a labau hpe hti hkaja la nna, anhte a prat hta mung, Karai Kasang Wa hpe aten jaw nhtawm, wenyi makam masham hpe grau n gun kaba wa hkra shakut sa wa nga ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)