San Pra ai Perpetua hte Felicity Yan a Poi Nhtoi (March 7) 07 March 2023

San Pra ai Perpetua hte Felicity Yan a Poi Nhtoi (March 7)

San Pra ai Perpetua hte Felicity Yan gaw, makam masham a majaw si hkam hkrum lai wa ai San Pra ai Masha Yan rai nga ai. Dai majaw, masha law law makam masham hte seng nna, n gun grai lu wa ma ai. Ndai San Pra ai Masha yan gaw, Tunisia Mungdan, Carthage (Kar-Tik) Mare kaw, Makam Masham a Sakse Tai nna sat kau hkrum ai San Pra ai amyu shayi yan rai ma ai.  

San Pra ai Perpetua gaw, makam masham a majaw, sat kau hkrum ai aten hta, shi a asak (22) ning sha naw rai nna, shi gaw, la kasha langai mi lu da ai ma kanu rai nga ai. Bai San Pra ai Felicity gaw, ma hkum re ai hte mayam num rai nga ai. Dai aten gaw, Uphkang du Septimus Severus kaw nna, Hpung Masha ni hpe makam masham a majaw, zingri sat ai aten mung rai nga ai. Ndai San Pra ai Numsha yan hte rau, tara laika sha naw sharin la nga ai, Saturninus, Secundulus hte Revocatus ni hpe rim la ma ai. Shanhte hpe tara hkaw Sara Saturus gaw, hkyuk htawng kata kaw Kashin Kamun Sacramentu sa jaw kau da wu ai. Dai shaloi, Sara Saturus hpe mung htawng kata kaw rim bang kau ma ai.

San Pra ai Perpetua a madu gaw, tara maigan masha rai nga ai. Dai majaw, shi a madu jan hpe makam masham a majaw sha, asak n jasum kau u ga matu, shadut wu ai. Madu jan Perpetua chyawm gaw, madu wa hpyi shawn ai lam hpe n hkap la ai sha, kasha shingtai hpe madu wa a lata kaw ap kau da nu ai.

San Pra ai Felicity gaw, htawng kata kaw ma shangai; ma dai hpe Hkristan Hpung Masha langai mi bau la kau wu ai. Ndai San Pra ai Numsha yan gaw, tara agyi ni a man kaw asum n jaw ai sha shan a makam masham hpe ngang ngang rai n hkrit n tsang nden ja ja rai nna, ninghkap lai wa ma ai. Dai majaw, shan hpe matse labye dusat ni sharawng tawn nna shawa hpawng hpe shangwi shapyaw ya ai shara kaw dun bang dat ma ai. Dai zawn dun sa ai aten hta shan gaw, “Shakawn Kunndawn Mahkawn Ga” ni hpe mahkawn let hkan sa wa ma ai.

Dai gaw, A.D (203) ning, March shata (7) ya shani byin lai wa ai lam rai nga ai. Shanhte rau dun sa wa ai marai masum hpe gaw, sharaw rawng gawk hte Tsap ni e amya je sha kau ma ai. San Pra ai Perpetua hte Felicity yan hpe gaw, dumsu ula langai mi hte daru sat ma ai raitim, lawan n si hkraw ai majaw, nhtu hte galun sat kau ma ai. San Pra ai Perpetua gaw, lata gari kawa re ai hte shi hpe kahtam sat maw ai wa a lata hpe gang la nhtawm shi a du kaw shading ya nna sat kau ai hkrum mat wa manu ai.

Dai zawn rai nna, Perpetua hte Felicity yan hpe zingri sat kau ai hpang, Nawku Hpung gaw, Shan Lahkawng hpe San Pra ai Masha dang dat let, Shan Lahkawng a Poi Nhtoi hpe mung, March shata (7) ya shani ngu masat shagrau dat ya sai rai nga ai.

Daini Nawku hpung gaw, San Pra ai Perpetua hte Felicity Yan a Poi Nhtoi hpe galaw nga ga ai aten hta, anhte a sak prat hkrun lam hta mung, kaning re ai ru yak jam jau lam ni hkrum katut wa ai raitim, tinang lu da sai makam masham hpe n nyet kau ai sha, gwi gwi sakse hkam lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)