Wudang hte Seng ai San Pra ai Angela a Poi Nhtoi (March 2) 02 March 2023

Wudang hte Seng ai San Pra ai Angela a Poi Nhtoi (March 2)

San Pra ai Angela gaw, 1846 ning, January shata (30) ya shani, Spain Mungdan, Seville Mare kaw shangai chyinghkai wa ai rai nga ai. Shi gaw, ma kaji ten kaw nna, Wudang ntsa e si hkam ai Madu Yesu Hkristu hpe grai tsawra hkungga myit rawng ai. Dai myit jasat hpe shi woi awn ai wuhpung kaw mung dawk bang ya wu ai.

San Pra ai Mama Angela gaw, Congregation of the Cross ngu ai Wudang hpe Laksan Hkungga Jaw ai Mama Wuhpung hpe shawng nnan gaw de hpang dat ai Mama rai nga ai.

Ndai Wudang a lachyum hpe alak mi rai nna, shadan shaleng ya ai Mama Wuhpung gaw; Matsan masha ni, masha ni e n kaw n law di hkrum ai ni, shing gyim ahkaw ahkang n lu ai ni hpe lak san yu gawn let garum jaw ya ai Mama ni rai nga ai. Dai Mama Magam Gun Wuhpung shang ni hkum nan mung matsan masha ni zawn sha sak hkrung hkawm sa ra ma ai. Dai majaw, shanhte yu gawn ya ai matsan ai kun dinghku ni, jahkrai ma ni, machyi makaw hkrum ai ni a matu kasi tai ya ma ai. Mama ni gaw, shanhte yu gawn ai ni hpe masha langai mi a matu ra ahkyak ai baw magup sumhpa hpaji ni yawng hpe sharin ya ma ai.

Shawa masha ni kaw na lu la ai madi shadaw alu kumhpaw kumhpa ni hpe, matsan masha ni nga a matu nga  shara, bu hpun palawng, tsi mawan jahpu jai lang na gumhpraw shatai ya kau ma ai. Hpunau tsawra myit hte shawa masha ni sa garum jaw ai hpe kabu gara chyeju dum myit hte hkap la nhtawm sak hkrung hkawm sa ma ai.

Mama Angela gaw, 1932 ning, March shata praw (2) ya shani hta, Madu kaw yup pyaw ban sa mat wa sai rai nga ai.

Mama Angela n nga mat ai hpang, 1982 ning, November shata (5) ya shani hta, dai aten na San Pra ai Wa Sarabyin Yawhan Pawlu (2) kawn Shi hpe Spain Mungdan, Madrid Mare kaba hta A-lu ai masha masat dat ya sai rai nga ai.

Dai hpang, 2003 ning, May shata praw (4) ya shani hta, San Pra ai Wa Sarabyin Yawhan Pawlu (2) sha mi shi hpe A-lu ai masha dang dat ai shara, Spain Mungdan, Madrid Mare kaba hta e, San Pra ai Masha dang dat let, Shi a Poi Nhtoi hpe mung, March shata praw (2) ya shani masat shagrau dat ya sai rai nga ai.

Daini Nawku Hpung gaw, San Pra ai Mama Angela a Poi Nhtoi hpe galaw nga ga ai aten hta, anhte hpung masha ni mung, Madu Yesu a Wudang hpe grau nna tsawra hkungga manu shadan let, shani shagu na anhte a Sak Hkrung Hkawmsa ai lam hpe Shi Madu hte rau hkawmsa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)