Wa Sarabyin Shawoi Na Hta Grau Ai Hku Shakut Ga

February 19, laban shani, Madu A Lamu Kasa Akyu Hpyi Ga tsun ten, Wa Sarabyin Francis, shawoi na hta grau ai hku shakut sa wa ga, nga nna kam sham ai hpung masha ni hpe saw shaga da nga ai. Anhte mara lu ai ni a matu si hkam ai Madu Yesu a kasi hpe hkam la let Madu hpe nhtang daw jau ra ga ai lam shadum jahprang da ai.Chyum Laika hpe gaw dai shani hti ang ai Mahte a Kabu Gara Shiga Chyum daw hpe lakap da ai. Ni htep hpu nau ni hpe tsaw ra na hte hpyen wa hpe mung tsaw ra ra ai lam hte seng ai rai nga ai.

Tinang hpe tsawra ai ni hpe nhtang tsaw ra ai gaw shawoi kadai mung galaw ai lam rai nga ai. Manang re ai ni hte manang tai hku hkau ai lam hpe mung kadai rai tim galaw ai lam rai nga ai. Shawoi a galaw nga ai lam ni hta lai jan nna kaja grau ai hpe galaw shakut ra ai.Lai jan nna hpa wa galaw sai rai kun? Anhte ni, dai ni, ahkyak da nna sung sung dinglik sam maram ra na ga ai."Shawoi na hta lai jan ai" hpe galaw ai gaw shadawn jitna n nga, masat jarit n tawn da ai sha, galoi mung a galaw nga ai hta grau dam lada, grau kaja ai lam hpe galaw sa wa ai lam rai nga ai.

Karai Kasang gaw galoi raitim, kadai hpe rai tim, maren mara tsaw ra ai. Shi a tsaw ra ai hpe hkap la nna anhte mung grau ai tsawra myit hte shada da tsawra ra ga ai; grau nna gaw hpyen wa hpe tsawra lu hkra shakut nna Karai Kasang a tsawra myit hpe shadan shadawng sa wa ra ga ai.Karai Kasang gaw anhte hpe jahtum ten du hkra tsawra ai. Anhte mung shi hpe jahtum ten du hkra nhtang tsawra ra ga ai. Anhte ni lam dam mat ai shaloi rai tim, shut hpyi mara hta lup nga nga ga tim, Karai Kasang gaw anhte hpe tsawra nga ding yang rai nga ai.

Anhte hpe tsawra ai Yesu gaw anhte a mara matu wudang hpai, nni nkri hkam, si hkam lai wa sai. Anhte shi hpe nhtang tsawra ai lam n nga, myit malai lu ai lam n nga ai rai yang gaw Yesu a tsawra ai hpe anhte hkum anhte pat shingdang la ai tai nga ai.Karai Kasang anhte hpe tsawra ai gaw galoi mung n htum hka yan zawn rai nga ai; hti n dang, htang n ma chyeju kaba rai nga ai. Anhte mung shi zawn rai nna hpu nau wa hpe mung, kaji htum wa hpe mung, hpyen wa hpe mung tsawra ra ga ai.

Nu Maria gaw Karai Kasang shi a ntsa hkang da ai lam shagu hpe "mai sa" ngu hkam la hkan shatup ai wa rai nga ai. Shi a kasi hpe yu la, hkan shadik let Karai Kasang hkang da ai lam ni hpe "mai sa" ngu htan let Nu Maria zawn sak hkrung sa wa ga. Dai zawn sak hkrung hkawm sa lu na matu Nu Maria kaw akyu hpyi htinglu htinglai chyeju hkam la ga, nga nna Wa Sarabyin Francis, kam sham ai hpung masha ni hpe saw shaga da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2023-02/pope-francis-angelus-address-19-february.html