Wa Sarabyin: Makam Masham Gaw Karai Kasang Hte Tsaw Ra Matut Mahkai Ai Labau Ginsi Re

February 12, laban ya shani, "Madu A Lamu Kasa Akyu Hpyi Ga" tsun ten, Wa Sarabyin Francis, Hkristan ni hpe, Karai Kasang hta tinang sak prat tup hte ap nawng let tsaw ra nga ga; makam masham gaw Karai Kasang hte tsaw ra matut mahkai ai labau ginru ginsa ginsi re, nga nna tsun shana da ai.Ja Chyum mungga hpe dai shani hti ang ai Chyum Laika daw ni hpe lakap da ai. Makam masham hpe gara hku jahkum shatsup ra ai lam hte seng ai rai nga ai. Dai gaw Karai Kasang hte shinggyim masha ni a lapran shada tsaw ra hkat ai lam rai nga ai; shada gahti galai tsaw ra ai, htihtang tsaw ra hkat ai lam, ga tsun ga la tsaw ra hkat ai lam hpe tsun ai rai nga ai.

Chyum Laika hta Madu Yesu tsun ai gaw, makam masham hpung tara lam ni hpe hkan shatup na gaw ahkyak ai, dai tara ni gaw kaja ai lam ni re; raitimung, dai tara ni gaw npawt gaw da hpang ai sha naw re ai; dai tara lam ni hpe hkan shatup let tara laika ni a sungla ai lachyum ni hpe chye na let sak hkrung nga sa ra ai, nga nna Wa Sarabyin tsun ai.

"Mawshe a Jep ai Tara hte myihtoi ni a sharin shaga ai ga ni hpe run jahten kau na matu ngai sa du ai zawn hkum nawn nga myit. Dai ni hpe run jahten kau na matu n rai, shanhte a sharin shaga ai lam ni hpe shadik na matu she, ngai sa du ring ngai" (Mt 5:17).Yesu Madu hte Shi a Mungga hpe chye na hkawn hkrang ai gaw makam masham shangang shakang na matu ahkyak ai "zaw" (key) rai nga ai.

Htung lailen ni hpe hka ja ai madang kaw sha naw rai yang gaw ahkyak dik ai ginchyum n rai shi ai hpe dum chye ra ai. Masha sat ai amu gaw ga si hte mung mai rai nga ai; num shaw/la shaw ai amu gaw myit masin hte mung mai rai nga ai; dai lam ni hpe dum chye koi gam kau ra ai. Dagam dala ga mung n mai tsun ai. Ndai lam ni hpe koi gam kau n lu yang gaw, tinang a makam masham hpe shangang shakang na n mai byin ai.

"Karai Kasang hpe nhtang tsaw ra ai gaw Shi a chyeju kumhpa nan rai nga ai" nga nna Wa Sarabyin tsun ai. Karai Kasang shawng she anhte hpe tsaw ra ai; shanglawt ai tsaw ra myit hte tsaw ra ai. Anhte gingdan ai majaw anhte hpe tsaw ra ai n rai, anhte ni tsaw ra hkra nga ai majaw mung n rai, anhte hpe matsan dum lama ai hte tsaw ra ai she rai nga ai.Anhte hpe shut hpyit ai masha ni a mara hpe anhte raw kau ya, prinem htingram lam galaw ngut jang she Karai Kasang hpe tsaw ra daw jau ai na matu Madu Yesu hkum nan matsun da nga ai. Dai rai yang she anhte a daw jau magam hte hkungga hpe Madu hkap la ya na rai nga ai.

Ndai lam ni galaw jang she Karai Kasang a myi npu hta tinang a makam masham hpe shangang shakang ai tai na ra ai.Ntsa lam nawku htung lai tara ni hpe sha hkan shatup ai gaw anhte a matu tawn da ai nawku htung lai tara ni gaw wan hkut zawn wam dam hkawm nna ahkyak ai de n du lu ai.Karai Kasang jaw da ai tara lam ni hpe ntsa lam htung lailen hku sha hkan shatup ga ai rai yang gaw anhte hkum nan dai tara lam ni a yaw shada ai bandung sa lam hpe pat shingdang da ai tai na ga ai.

Karai Kasang anhte a ntsa tsaw ra ai hpe masat jitna hte n shadawn ai; nang hpe dairam du hkra tsaw ra ai, ngai hpe dai ram du hkra tsaw ra ai ngu masat da ai lam Karai Kasang hta n nga ai; htani htana tsaw ra ai Wa rai nga ai.Karai Kasang a "Tsawra Tara" gaw anhte a akyu ara matu gaw de da ai tengman tara lam ni hpe hkan shatup lu shangun ai, kam sham lu shangun ai, Shi a sak prat hpe mung jaw bang ya ai.Ya kaw nna, matut manoi, tinang hkum, Madu Yesu jaw da ai "Tara Kaba" hte maren sak hkrung nga sa ga ai kun, san jep let sak hkrung nga ga, nga nna Wa Sarabyin Francis hpang jahtum n-gun jaw saw shaga da ai.

"Dai Madu na a Karai Kasang hpe na a myit kraw lawang mahkra hte, na a asak mahkra hte, na a n-gun lagaw mahkra hte tsaw ra nga u" (Tara Jahprang 6:5; Jaw Jau 19:18: Mt 22:38-39)."Shada da tsaw ra nga mu, ngu nna Tara Ningnan ngai nahte hpe jaw da made ai. Ngai nanhte hpe tsaw ra made ai zawn, nanhte mung shada da tsaw ra nga lu na rai myit dai" (Yh 13:34).

By Fr. Patrick Gawmaw Hkawng Yae

#vaticanews

#rvakachinservice

#popefrancis

https://www.vaticannews.va/en/pope/news/2023-02/pope-francis-angelus-catechesis-love-mercy.html