San Pra ai Peter Damiani a Poi Nhtoi (February 21) 21 February 2023

San Pra ai Peter Damiani a Poi Nhtoi (February 21)

          San Pra ai Peter Damiani gaw, lai wa sai 1007 ning hta, Italy Mungdan, Ravenna Mare kaw shangai chyinghkai wa ai rai nga ai. Shi gaw, Nawku Hpung a Hpaji Ninghkring langai mi mung rai nga ai.

Shi ma kaji naw rai nga ai aten kaw nna, kanu yan kawa n nga mat ai. Kahpu langai mi hte nga ai raitimung, kahpu gaw shi hpe mayam langai mi hpe zawn yam sha ai, wa rem shangun wu ai. Raitimung, shi hpe tsawra matsan dum myit rawng ai kahpu langai mi kawn laika hpaji sharin shangun ai. Shi gaw, laika hpaji grai ram ai majaw, hpang de hpaji ning hkring langai mi byin tai wa sai rai nga ai.

Peter Damiani gaw, yak hkak ai lam hkam sharang ai, lusha gam ai, lu ai sutgan hpe mung ra kadawn nga ai ni hpe gam garan jaw kau ai. Shi a kata palawng mung, kara hte galaw ai hpe bu hpun ai. Shi a sha-ku hta mung matsan masha ni hte arau shat sha nga ai hpe masha ni law law mu lu ma ai. Mastsan masha ni hpe shi a lata hte nan galaw daw jau nga nga rai wu ai.

Dai hpang Peter Damiani gaw, Fonte Avellana shara kaw na Benedictine Tawra Jau Jawng kaw shang mat wa ai. Shi Jau tai ai hpang dai jawng kaw Jau Kaba lit shatsam ya hkrum sai. Shi gaw, akyu hpyi ai, makam masham lam myit sumru ai, wenyi hte seng ai laika buk ni ka lajang ai, laja lana re ai amu ni galaw ai. Shi hte seng ai Jau ni hpe mung, asim sha nga shaman na lam, shagrit shanem ai myit hte matsan dum lama chye ai myit hpe kasi hte nan madun sharin ya sai.

1057 ning hta Wa Sarabyin Stephen (IX)(9) gaw, shi a hpaji jaw shatai na matu Jau Peter Damiani hpe shaga la wu ai. Dai majaw, lit dai hpe lit hkap la ai sha n-ga, ntsa na ni a ga madat ai majaw, shi gaw Ostia hte Velletri mare kaw na Saradaw aya, dai hpang Cardinal aya tang da ai hpe hkap la nu ai. Raitimung, shaning law law dai lit ni gun hpai hpang, Wa Sarabyin Alexander (II) kaw na ahkang hpyi la lu ai majaw, shi gaw, Tawra Jau lit hpe bai galai gun hpai nna nga mat wu ai.

Saradaw Damiani gaw, Nawku Hpung lang ai Chyoi Pra ai arung arai ni hpe manu jahpu sharawt nna dut ai lam hte ngang gayut nna hkum shan pyaw len lam ni hpe ja ja mara jaw shading sharai ya lai wa sai. Florence mare kaw na, Saradaw langai mi hpai da da ginsup nga ai hpe shi mu ai shaloi, Saradaw hpe n a-gam ai sha ja ja daru kau wu ai. Lachyum n pru ai sha majoi nga prang hkawm ai Jau ni hpe mung aja awa nan shadum ya, shading sharai ya lai wa sai. “Myit n bra ai sha, asim sha rai chye nga ai myit jasat ni gaw, Jau ni a matu ahkyak kaba dik langa mi rai nga ai” nga nna tsun shadum ai. Sadaw Damiani gaw, myit malai lu ai ni hpe grai kabu gara rai nna hkap la wu ai.

San Pra ai Saradaw Peter Damiani gaw, Faenza mare kaw 1072 ning hta Madu kaw yup wa sai rai nga ai. Shi hpe 1828 ning hta Nawku Hpung kawn Hpaji Ninghkring ngu nna masat shagrau dat ya sai n-ga, February shata (21) hpe Poi nhtoi hku nna masat dat let, San Pra ai masha dang dat ya sai rai nga ai.

Daini Nawku Hpung gaw, San Pra ai Saradaw Peter Damiani a Poi Nhtoi hpe galaw nga ai hte maren, anhte marai hkum shagu mung, kade mi ru yak jam jau, matsan mayam rai nga ra ai raitim, tinang chye la gying ai, hpaji hparat lam ni hpe manu shadan hkaja la let, tinang lu da sai hpaji machye machyang lam ni hpe mung, bai gam garan, lam madun ya lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)