San Pra ai Scholastica a Poi Nhtoi (February 10) 10 February 2023

San Pra ai Scholastica a Poi Nhtoi (February 10)

          San Pra ai Scholastica gaw, San Pra ai Benedict a kana rai nga ai. Shi gaw, lai wa sai A.D (840) ning hta Italy Mungdan, Nursia mare kaw shangai chyinghkai wa sai rai nga ai. Shi a kanau San Pra ai Benedict gaw, Monte Cassino shara kaw Tawra Jau tai mat ai shaloi, shi mung dai jawng makau kaw Plobarola shara na Mama Jawng kaw bungli galaw garum let sa nga mat ai. Shi gaw, kanau Jau Benedict hpe laning mi hta kalang mi sha sa jahkrum hkrum di wu ai. Shan nau gaw, Jau ni a jawng makau kaw na nta kasha kaw sa hkrum shaga hkat hkat rai ma ai.

Kalang mi na shan nau hkrum hkat ai hpang loi mi naw na hkra nga na matu Kanau San Pra ai Benedict hpe kana San Pra ai Scholastia hpyi wu yang, kanau Benedict n hkraw ya ai. Shaloi, Scholastic gaw lata lahkawng ding nyawm nhtawm, Karai Kasang kaw akyu hpyi ya ai. Shaloi jang, Karai Kasang e, nbung laru kaba shabung dat ai majaw, Benedit hte shai a manang ni gaw shanhte a jawng de n wa lu mat ma ai. Shaloi kanau Jau Benedict gaw, “Ah Shawng, nang hpa galaw dat wa sata? Karai Kasang nang hpe mara raw ya u ga law.” ngu wu ai. Shaloi San pra ai Scholastica gaw, “Ngai nang hpe hkring mi naw nga ga ngu hpyi ai. Nang n hkraw ndai. Dai majaw, ngai Karai Kasang kaw hpyi nem ai re. Ya gaw, Karai Kasang lajang ya sai.” ngu nna bai htan ya wu ai. Dai majaw, shan nau gaw, dai shana tup Karai Kasang hte seng ai lam, san seng san pra lam, htawm hpang na htani htana ngwi pyaw simsa lu na lam, shana tup bawng ban jahta ma ai. Hpang shani she shan nau hka bra mat ma ai.

Ndai zawn shan nau hkrum ai hpang (3) ya na ai shaloi, San Pra ai Scholastica gaw, Madu kaw yup pyaw ban sa wa sai rai nga ai. Kana nsa hti wa ai aten hta Jau Benedict gaw, shanhte a Nawku tawn a man kaw shi chyu sha akyu hpyi nga ai aten re. Shi akyu hpyi nga yang, ntsa de mada dat yu ai shaloi kana San Pra ai Scholastica a wenyi gaw, u hkru du zawn sumsing mungdan de lung wa ai hpe mu dat wu ai. Shi gaw, shi a manang Tawra Jau nkau mi hpe kana a moimang sa la wa shangun nhtawm, shi a matu nga nna shi hkum nan lajang da ai Lup nhkun kaw lup makoi mayang da sai.

San Pra ai Scholastica gaw, A.D 543 ning, February shata (10) ya shani, Madu kawn yup pyaw mat wa ai rai nna, Kanau Jau Benedict mung, kana n nga mat ai hpang mali ning ngu na A.D (547) ning hta Madu kaw yup pyaw ban sa wa sai lam chye lu ai.

Daini Nawku hpung gaw, San Pra ai Scholastica a Poi Nhtoi hpe galaw nga ga ai aten, anhte mung, tinang a kahpu kanau, dum nta masha ni shada da, makam masham lam, wenyi lam ni hta n gun jaw hkat let, Madu Karai Kasang Wa myit ra ai hku nna hkawmsa lu na chyeju atsam jaw ya rit ga matu akyu hpyi nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)