San Pra ai Angela Merici a Poi Nhtoi (January 27) 27 January 2023

San Pra ai Angela Merici a Poi Nhtoi (January 27)

San Pra ai Angela Merici gaw, Italy Mungdan, Garda hka nawng makau kaw na, Desenzano mying ai mare kaw e, lai wa sai 1474 ning, March shata (21) ya shani hta shangai chyinghkai wa ai rai nga ai. Shi a chyinghkai Kanu yan Kawa gaw, shi grai naw kaji ai aten hta n-nga mat wa masai. Shi gaw, San Pra ai Ursula Mama Wuhpung (Company of Ursula) hpe gaw de hpang da ai San Pra ai masha mung rai nga ai.

Shi a kana hpe shingran mu ai hpang, Angela gaw, Franciscan Mama tai mat wa sai. Shi mu ai shingran gaw; “Lani mi na nhtoi hta shi gaw wenyi ni hpe hkye la na ramma wuhpung hpe de hpang na rai nga ai” hpe shingran mu ai rai nga ai.

Shingran mu ai hpang, shi gaw numsha ma ni hpe lam woi madun na matu, Desenzano mare kaw langai, Brescia mare kaw ramma ni a matu laika hpaji sharin jawng langai mi hpaw ya sai. Shi a manang amyu shayi sha ni marai (12) gaw, ga sadi tawn timung, yumaya buhpawn palawng bu hpun sumraw nhtawm, matsan mayan re ai ma ni hpe laika sharin ya ai hte akyu hpyi ga ni sharin ya rai nna, ding ngam shakut shaja let e, Mama Wuhpung hpe hpaw hpang la ma ai.

Shanhte jawm nga ai shara mung, Mama jawng zawn re ai kaw n rai, Hpunau tsawra myit jasat (Charity), hte Wuhpung kata tsawra ra myit (Family spirit) ni hpe grau tang du hkra sharin la lu na matu, ma ni hpe shanhte a dum nta hkan kaw nan sa du sharin ya hpang ma ai.

1512 ning du ai shaloi, shanthe gaw, Mama Wuhpung hpe tara shang hkrang hte hkrak rai nna de hpang wa ma ai. Dai Mama Wuhpung hpe San Pra ai Ursula lak san makap maga ya na matu yaw shada let, San Pra ai Ursula Mama Wuhpung ngu nna shamying ma ai. San Pra ai Ursula gaw, mungkan na Dakkasu ni kam shamyet ai San Pra ai masha mung rai nga ai. Ursula Mama Wuhpung ni woi awn ai laika sharin jawng ni gaw, Italy Mungdan na, Kahtawlik Nawku Hpung a matu, matut ding yang galu kaba lam shabyin ya nga sai re.

Angela Merici gaw, 1540 ning, January shata (27) ya shani, Shi a asak (13) ning hta hpang jahtum na Sacramentu rai nga ai, Nam Man Sau Chya ai Sacramentu hpe n hkam la lu ai sha, Madu hta yup pyaw ban sa wa sai rai nga ai.

Angela Merici n nga matai hpang, 1768 ning, April shata (30) ya shani hta, dai aten na, Wa Sarabyin Clement (XIII) gaw, shi hpe A lu ai masha masat dat sai rai nga ai.

Dai hpang, 1807 ning, May shata (24) ya shani gaw, dai aten na, Wa Sarabyin Pius (VII) kawn shi hpe San Pra ai Masha dang dat nna, shi a Poi Nhtoi hpe January shata (27) ya ngu masat shagrau dat ya sai rai nga ai.

Daini Nawku Hpung gaw, San Pra ai Angela Merici a Poi Nhtoi hpe galaw nga ai aten hta, anhte a prat hta mung, kaning re ai myit ru myit yawn lam, garen gari lam ni hkrum sha wa ai raitim, Madu Karai Kasang WA a shaga la ai lam hpe na lu ai hte rau shi myit ra sharawng ai, magam hpe gun hpai hkawmsa lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)