San Pra ai Anthony a Poi Nhtoi (January 17) 17 January 2023

San Pra ai Anthony gaw, lai wa sai A.D (251) ning, January shata (12) ya shani hta Egypt Mungdan kaw shangai chyinghkai wa ai rai nga ai. Shi gaw, Zaibru Jang kaw alak mi rai nna tara sa shatup ai Tawra Jau Wuhpung hpe hpaw hpang da ya sai. Shi gaw, Sutgan grail u ai wa re, shi a Kanu hte Kawa n nga mat ai hpang, shi a law la ai amu galaw sha na lamu ga hte sut rai ni hpe shi a langai sha re ai kanau jan hte rau jawm yu lajang ma ai. Shi a kanau jan hpe grai tsawra let woi kaba lai wa wu ai.

San Pra ai Anthony gaw, shi a asak (20) ning du ai lani mi hta Misa Hkungga lawm nga yang hti ai Kabu Gara Shiga kaw e: “Nang gaw, htani htana asak hpe lu la mayu jang, nang lu ai hpe dut kau nna matsan masha ni hpe gam garan jaw kau u. Shaloi nang gaw, sumsing ja mungdan kaw na sutgan hpe lu la na re; dai hpang ngai kaw hkan rit.” (Mahte 19:21) nga nna na dat ai.

Dai shaloi, shi a myit daw dan ai lam galaw sai. Shi hta kaja wa ra kadawn nga ai arung arai ni hpe sha la tawn da nhtawm, ngam ai shan nau a arung arai ni hpe dut kau nu ai. Bai nna, “Na a asak hkung nga lu na matu, hpe sha na, hpa lu na, hpa hpun na ngu nna hkum myit tsang nga u.” (Mahte 6:33) nga ai Ja Chyum Mungga hpe bai matut na lu ai majaw, shi a nagam nga ai sutgan ni hpe gam jaw kau nna, shi tsawra di kai kanau jan hpe gaw, Mama Jawng kaw sa kau da nhtawm, shi gaw, Zaibru Jang de tara sa shadik let Tawra Jau tai na matu sa mat wa nu ai.

Zaibru Jang kaw e, San Pra ai Anthony tara shadik nga yang, n hkru ai nat satan gaw hkum shan ngang gayut hkawm ai grai tsawm ai mahkawn kasha nsam hte agung alau saw jaw jaw re ai. Dai hta n-ga, Satan gaw, matse labye nam dut sat nsam hte mung sa gunglau jahkrit hkrit re ai. Dai agung alau jaw ai ni gaw, San Pra ai Anthony hpe shi lu ai mungkan sutgan hte mungkan ntsa kade pyaw len lu ai hpe shing raw raw madun let gung lau, myit shalau ya ai. Raitimung, San Pra ai Anthony chyawm gaw, dai agung alau kaba ni hpe akyu hpyi, lusha gam ai let ning hkap kau lu nga wu ai.

Masha law law wa San Pra a Anthony kaw nna Wenyi hte seng ai hpaji ni sa hpyi shajang ma ai. Dai zawn shi a hpang hkan ai ni law wa ai majaw, Nawku Hpung a labau hta shawng nnan na Taraw (Hermit) Magam Gun Wuhpung hpe shi hkum nan de hpang da ya sai rai nga ai. Shi a hpang hkan ai ni hpe shana du jang, “Hpang Jahpawt nsa gaw naw hkrung nga na kun; jahpawt rai jang shana du hkra asak naw hkrung nga na kun, ngu galoi mung myit dum sumru let nga na matu shadut shadum ya ya re ai. Tinang ya galaw nga ai amu gaw, tinang a hpang jahtum galaw ai amu rai na kun?” ngu myit la let atsawm sha galaw na matu aten shagu shadum ya ai.

San Pra ai Anthony gaw, akyu hpyi nna aten shama ai lam, lusha gam nna tinang a myit ra lam hpe nyet kau ai myit jasat, asim sha nga nna lata amu galaw shaman ai ladat ni hpe hkan shatup nna asak hkrung nga lai wa nu ai.

San Pra ai Anthony gaw, A.D (356) ning, January shata (17) ya shani, shi a asak (105) ning hta Madu kaw e yup pyaw ban sa wa sai rai nga ai.

Shi n nga mat ai hpang, Nawku Hpung gaw, shi hpe San Pra ai Masha dang dat let, shi a Poi Nhtoi hpe mung, January shata (17) ya shani masat shagrau dat sai sha n-ga, St. Anthony the Great ngu nna mung kahtap shagrau dat ya sai rai nga ai.

Daini Nawku Hpung gaw, San Pra ai Anthony a Poi Nhtoi hpe galaw nga ai aten hta, anhte mung dinghta ga a ja sut gan hte mungkan a pyaw hpa len hpa lam ni hpe tawn kau da nna, Madu a shaga la ai nsen hpe madat la nhtawm, shi a hpang hkan kaja ni tai wa lu hkra shakut sa wa nga ga law.  

By;

Sister Rose Angeline Maran Nang Doi (SFX)

RVA-Kachin Service (Myitkyina)