Hkungran Sakrementu Hte Seng Ai Lam Ni

 (marriage in catholic but divouced by cultural) San: Mi gaw Catholic hku Hkung ran la sai num hpe du salang ni hte bai hka mak ai hpang, buda bai tai, dai hpang num bai la jang mi na hpung hku bai nga na dai num hpe mu mi na hku hkungran la na nga yang mai na kun chye mayu ai majaw san dak lu nngai wa jau chyeju hte htai ya rit. Muse jau a seng, Nam Um Buga Hta Shanu nga ai Monica Zing Hang Roi Ja a ga san hpe htai ya na nngai.

Htai: Kahtawlik nawku hpung hta gaw nawku hpung a tara hte maren tara shang hkungran da ai hpe kadai mung jahka ya n lu ai. Dai hkungran ai lam n awng ai sakse ni nga yang mung nawku hpung kawn sha dai hkungran sai lam n awng ai hkungran sakramentu hpe bai shaprai kau ya na ahkaw ahkang nga ai.

Hkungran sakramentu n awng ai (Nullity Case) ngu ai gaw kaning re ai masa hpe tsun ai rai?

Hkungran ga shaka n awng ai hpe tsun ai. Dai majaw la sha hte num sha tara shang madu wa, madu jan n tai ai. Lama na, ndai masa hta re ai madu wa hte madu jan hpe jahka nna, rau nga na tsep kawp n mai byin ai mabyin masa hpe Nawku Hpung kata daru magam ahkaw ahkang nga ai ni hpang de tang shawn nna san jep sawk sagawn ra ai. Lama na, hkungran sakramentu n awng ai sakse madun lu ai rai yang ndai yan a hkungran sakramentu hkam da ai hpe Nawku Hpung kata ahkaw ahkang nga ai ni kawn dai hkungran sakramentu n awng ai lam ndau nna shanhte lahkawng gaw shanglawt ai hte kaga masha hte hkungran sakramentu bai hkam la na ahkaw ahkang nga ai.

Hkungran sakramentu awng ai lam masum nga ai. (1) shada myit hkrum ai lam nga ai; (2) myit hkrum ai lam hte seng nna shut shai ai lam n nga ai; (3) Nawku hpung tara hte maren masat da ai tsang madang ni nga ai. Ndai lam masum hte hpring ai rai yang gaw hkungran sakramentu awng ai (C.1057).

Hkungran sakramentu n awng ai lam mung masum nga ai. (1) Defect in Matrimonial Consent, hkungran ga shaka tawn ai hta shut shai ai lam ni nga ai; (2) Diriment Impediments, Nawku Hpung tara hte maren pat shing dang da ai lam ni hte wa hkra ai; (3) Defect in (or) absence of canonical form, Nawku Hpung tara Canon upadi hkrang hta wa hkra ai shut shai ai lam nga ai, shing n rai, Canon upadi hkrang masa hte n re ai, hkrang masa n nga ai lam ni rai nga ai.

Hkungran sakramentu n awng ai lam ndau ya lu ai gaw Eccelesiastical Marriage Tribunal, Nawku Hpung kata na tara rung sha rai nga ai (C. 1671, 1476 ni hta tsun sang lang da ai).

Canon 1671: Marriage cases of the baptized belong to the ecclesiastical judge by proper right. Kashin kamun hkam la da ai ni a hkungran sakramentu mang hkang hpe gaw Nawku Hpung kata tara shang tara agyi a tara ai mahkrun lam hku daw dan ai hpe sha hkam la ra ai.

Canon 1476: Anyone, whether baptized or not, can bring action in a trial; however, a party legitimately summoned must respond. Kashin Kamun hkam la da ai ni mung, n hkam la da ai wa kadai raitim, Kahtawlik nawku hpung hte matut manoi ai, seng ai rai yang nawku hpung tara rung kaw tara shawk sawn mai ai.