San Pra ai Peter Orseolo a Poi Nhtoi (January 10) 10 January 2023

San Pra ai Peter Orseolo gaw, Italy Mungdan, Venice mare hta lai wa wai A.D (928) Ning hta shangai chyinghkai wa ai rai nga ai. Lit law law shatsam ya hkrum ai hpe tang du hkra shi gun hpai lai wa nu ai.

San Pra ai Peter Orseolo gaw, Shi a asak (20) ning sha naw rai yang, Hka Dap a ningbaw lit shatsam ya hkrum wu ai. Sang hpaw law law hpe panglai Da-mya ni shatsang jahkrit shama ai hpyen kaw na hkye la lu nu ai. Dai hpang n myit mada ai sha, Venice mare ting wang hkru mat ai majaw, mare masa ni n rap n ra mang hkang kaba byin wa sai. Raitimung, shi gaw, dai mayak mang hkang hpe apyaw sha shatsim kau ya lu nu ai.

Asak (32) ning rai sai, Shi a  ning rum ning tau jan gaw, shadang lasha langia shaprat ya wu ai. Dai zawn rai kasha lasha lu ai hpang shi gaw, dinghku prat hpe tawn kau da nna Benedictine Jau Magam Gun Wuhpung de shang na matu daw dan kau nu ai.

Dai majaw, Fransik hte Spain Mungdan lapran na Roussilion mare, Cuxa shara na San Michael Jau Tai Jawng kaw hpaji sharin hpang wa nu ai. Shi Jau tai wa ai hpang alak mi rai tara shatup ai ginra langai mi gaw gap nna dai shara hta, jam jau hkam sharang, akyu hpyi shaja, tara shadik nna nga lai wa sai.

A.D (987) ning hta gaw, shi Tara shadik nga ai shara kaw, Madu hta yup pyaw wa sai rai nga ai. Shi a lupwa kaw lamik kumla law law byin pru wa ai. dai aten hta hkan shatup ra ai masing hkan nna, shi n nga mat ai hpang (40) ning ngu na, 1027 ning hta e, Venice ginwang up Saradaw Arnulf kawn, Shi hpe A Lu ai masha hku nna, masat shagrau dat ya sai.

Dai hpang, 1713 ning hta, dai aten na Wa Sarabyin Clement (XII) kawn Shi hpe San Pra ai Masha dang dat let, Shi a Poi Nhtoi hpe mung, January shara (10) ya shani ngu masat shagrau dat ya sai rai nga ai.

Dai ni, San Pra ai Peter Orseolo a Poi Nhtoi hpe galaw nga ga ai aten hta, tinang kaning re ai prat hte sak hkrung hkawmsa taw nga ai raitim, Karai Kasang Wa shaga la ai nsen hpe na ai hte rau Shi a Magam hta shang tsap lu na atsam ni anhte marai hkum shagu hpe jaw ya rit ga matu, lak san akyu hpyi la nga ga law.

By; Sister Rose Angeline Maran Nang Doi (SFX)

RVA-Kachin Service (Myitkina)