Hkristmas Poi (December 25) 25 December 2022

Hkristmas Poi (December 25)

Yesu Shangai Wa Ai Lam

Lai wa sai, 2000 ning jan hta, Roma Hkawhkam Caesar Augustus gaw, Roma mungdan ting hta nga ai masha ni hpe yuptung jahpan wa bang na matu, tara jahkrat dat wu ai. Dai jahpan hta la ai aten gaw Kureni (Quirinius) ngu ai wa Suri mung hta munggyi tai nga yang, shawng hta la ai jahpan rai nga ai. Shaloi masha mahkra gaw amying shalawm na matu, langai hte langai tinang a mare de wa ma ai.

Yosep mung, Dawi a aru arat hte kashu kasha rai nga ai majaw, Galile mung, Nazaret mare kaw nna, Yuda mung na Dawi hkawhkam a shangai daidaw buga rai nga ai Betlehem mare de lung wa ai. Shi gaw, shi mahtan da ai num Maria hte rau, amying wa bang na matu lung wa ai. Maria chyawm gaw na-um nasin hkum rai nga ai. Shan Betlehem e naw nga nga yang, Maria a matu shangai nhtoi gu nu ai. Shi gaw shadang sha alat shangai nu ai: nbat hte kayawp nhtawm ushat wakang hta kaleng tawn da wu ai; kaning rai nme law, manam jarawp hta shanhte a matu nga shara n nga malu ai.

Sagu Rem Ni Hte Lamu Kasa Ni

Dai shara makau kaw sagurem ni law law mung, shanhte a sagu ni hpe nam na dusat ni hte lagut ni a lata kaw na makawp maga na matu, sin let maja nga ma ai. Shanhte kaw, Madu a Lamu Kasa dan pru let: “Daini e, Dawi a mare kaw Messiah Hkye La Madu gaw, nanhte a matu shangai wa sai. Shi hpe nanhte chye lu na kumla gaw, ndai rai nga ai; U-shat wa kang hta ma chyangai hpe sumpan hte gayawp nna galeng tawn ai hpe mu lu na rai myit dai.” nga nna tsun wu ai.

Dai hkring mi na laman hta lamu kasa wunawng kaba gaw, Karai Kasang hpe shakawn shagrau let: “Matsaw lahta tsang e, Karai Kasang kaw hpung shingkang a nga nga u ga law! Ga ntsa e mung, Shi sharawng awng ai ni a ntsa e, ngwi pyaw simsa ai gaw anga nga u ga law!” nga nna wu wu di di mahkawn nga ma ai.

Sagurem ai ni tin shapun rai Betalehem mare de sa wa ma yang, U-shat wa kang hta galeng nga ai, Ma Yesu hpe mu lu ma ai. Ma Chyangai hpe mu lu ai shaloi, shanhte hpe tau hkrau nna, Lamu Kasa ni tsun ai ga hpe chye madat wa ma ai. Sagurem ni kaw na, shanhte na lu ai ga ni a majaw, shanhte mau nga ma ai. Maria chyawm gaw, ndai mabyin ni yawng a lam myit sumru yu nga wu ai. Sagurem ni gaw, shanhte mu ai mabyin ni a majaw, Karai Kasang hpe shakawn shagrau let shanhte a shara de bai n htang wa ma ai.

Sinpraw Mung Na Hpaji Rawng Ai Ni

Herod Hkawhkam a lakhtak e, Yuda mung na, Betlehem mare hta Yesu shangai wa sai. Shangai wa ngut ai hpang, gade n na yang, sinpraw mung na hpaji rawng ai masha nkau mi, Yerusalem mare de sa du ma ai rai nna, “Yuda ni a hkawhkam tai na matu shangai wa sai ma gaw kanang rai nga a ta? Sinpraw mung hta e shi a shagan dan pru ai hpe anhte mu lu sagaw ai rai nna, shi hpe nawku na anhte du sa ra ga ai,” nga nna san ma ai.

Herod Hkawhkam dai lam hpe na jang, shi hte Yerusalem mare masha ni yawng myit kahpra nga ma ai. Herod hkawhkam gaw, dai amyu a hkinjawng agyi ni hte tara sara ni yawng hte hpe shaga jahpawng da nhtawm, “Meshia kanang e shangai wa na rai ta?,” ngu nna shanhte hpe san mu ai.

Shanhte gaw, “Yuda mung na Betlehem hta e shangai wa na ra ai: hpa majaw nga yang, myihtoi a lata hte ning nga nna ka da nga ai, ‘Yuda mung na Betlehem e, nang gaw Yuda mung na mare ni hta kaji htum nga ndai n rai; nye a amyu Israela hpe woi rem na Du gaw nang kaw nna paw pru na ra ai,’” nga ai, ngu nna shi hpe tsun dan mu ai.

Shaloi Herod gaw, sinpraw mung na hpaji rawng ai ni hpe lagyim, shaga jahpawng la nna, dai shagan dan pru ai ladaw hpe shanhte kaw na azin ayang san achyin la wu ai. Dai hpang Hkawhkam wa gaw, shanhte hpe, “Nanhte sa nna dai ma kaji hpe azin ayang hkan tam nna, shi hpe mu hkrup jang, ngai mung shi hpe sa nawku lu n ga, ngai hpe wa shana ya mi,” ngu nna matsun dat mu ai.

Shing rai shanhte pru mat wa ma ai rai nna, lam e Sinpraw mung kaw nna shanhte mu ai shagan hpe nan bai mu lu ma ai shaloi, shanhte nachying kabu gara nga ma ai. Dai shagan mung ma kaji nga ai shara a ntsa e ang ang di rai sa hkring mat ai ten du hkra shanhte a shawng e sa wa ai. Shanhte dai nta hta e shang bang wa ma yang, dai ma kaji hte kanu Maria hpe shanhte mu mu ai rai nna, lahput hput di let shi hpe nawku mu ai. Tinang a sut sumpu hpaw nna, shi hpe aja, lawban, mura ngu ai kumhpa ni sak jaw mu ai.

Herod hpang hku bai n htang wa mu ga, dai Madu gaw yup mang hta shanhte hpe sadi jaw da mu ai majaw, shanhte gaw tinang a mung de, lam kaga hku wa mat ma ai.

Daini gaw, anhte Hkristan Hpung Masha ni sha n rai, Mungkan mungdan shara shagu hta shanu nga ai ni yawng gaw, Madu Yesu Shangai Wa ai (Hkristmas Poi Kaba) hpe galaw nga ga ai re. Lahta de na Kabu Gara Mungga ni hta anhte mu hti la lu sai hte maren, anhte mung shangai wa sai Madu Yesu hpe shagrit shanem ai myit hte hkap tau la ga, tinang a manaw manang ni hpe mung Hkristmas a Kabu Gara ai lam hpe gam garan ya ga, ru yak jam jau hkrum nga ai ni, kaw si hpang gara hkrum nga ai ni hpe dang lu ai made lakawn lanawn garum shing tau la nga ga law.

RVA hpe galoi mung n gun jaw la nga ai, Nu Wa Hpunau ni yawng hpe “Merry Christmas” rai u ga ngu akyu hpyi shakram dat n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)