San Pra ai Peter Canisius a Poi Nhtoi (December 21) 21 December 2022

San Pra ai Peter Canisius a Poi Nhtoi (December 21)

San Pra ai Peter Canisius gaw, “Kahtawlik Htangdip Gawng ni a Kasa” nga nna shagrau sha-a hkrum ai wa rai nga ai. Shi gaw, lai wa sai 1521 ning, May shata (8) ya shani hta, Holland Mungdan, Nijmegen mare kaw shangai chyinghkai wa ai rai nga ai.

Shi kaba wa ai shaloi Louvain mare na, Dakkasu kaw hkansa ritkawp tara hpaji (Law) hpe shata ru let sharin la ngut la ai hpang, dai hpaji gaw shi a matu nau akyu pru na lam nmu ai majaw, Brang sek ga sadi tawn nna, Cologne mare hta, Karai a Hpaji (Theology) hpe sharin la wu ai. Dai yang e, San Pra ai Ignatius a shawng na hpang hkan Jau langai mi rai nga ai, Jau Peter Feber woi awn ai myit sumru akyu hpyi wut-sawk sa lawm wu ai. Dai akyu hpyi sumru hpawng a majaw, shi gaw Jesuit Jau Wuhpung de shang mat wa nu ai.

Peter Canisius, Jau tai wa ai hpang, San Pra ai Ignatius gaw shi hpe, “Gara de mi shangun ngun, hpa mi galaw galaw shangun ngun jin jin re ai, sasana magam gun ni a lak san kasi kamang” (Prepared to go anywhere and to do anything, a model religious) ngu nna, myit la wu ai.

San Pra ai Peter Canisius gaw, Roma mare kaw nna, Germany mungdan de, shangun dat ai hkrum wu ai. Germany mungdan kaw, Protestant hpung ni a dingbai dingna jaw ai hpe apyaw sha ning hkap hkau lu ai. Hpung masha ni a makam masham hpe mung shi shangang shakang ya sai.

1552 ning hta, San Pra ai Peter Canisius gaw, Viena mare de shaga la hkrum nu ai. Dai mare kaw na, Hpung masha (100) kaw na marai (90) daram gaw, Kahtawlik makam masham hpe kabai kau da ai aten mung rai nga ai. Jau jawng ni mung, majoi kabai kau da mat ma nhtawm, shaning (20) ning lapran Jau langai mi pyi n ntai wa lu ai aten rai taw ai.

San Pra ai Jau Peter Canisius a matsan dum tsawra ai myit a majaw, masha law law hpe myit jasat nnan bai lu dawk bang ya lu ai. Shi gaw, machyi makaw hkrum nga ai ni hpe sa du gawan ai, htawng rawng masha ni hpe gawan katsan ai, matsan masha ni hpe garum madi shadaw ai amu magam hpe madung tawn nna galaw lai wa ai. Kahtawlik htangdip gawng ni a madang hpe byin ai made sharawt shatsaw ya ai. Shi ka lajang tawn ai tara laika ni hpe shi asak hkrung nga ai aten hta sha pyi, 200 lang kahtap gayet shapraw la lang ra mat ai sha n-ga, ga hpan (15) hte gale la nhtawm, sharin shabra ya ma ai.

Dai zawn, shagrit shanem myit rawng ai, San Pra ai Wa Jau Peter Canisius gaw, 1579 ning, December shata (21) ya shani, Switzerland Mungdan, Fribourg shara hta, Madu kaw yup pyaw ban sa mat wa sai rai nga ai.

Wa Jau Peter Canisius n nga mat ai hpang, 1864 ning hta, dai aten na Wa Sarabyin Pius (9) gaw, Shi hpe, A-lu ai Masha ngu masat dat ya sai rai nga ai.

Dai hpang, 1925 ning, May shata (21) ya shani hta gaw, dai aten na, Wa Sarabyin Pius (11) kawn, Shi hpe, San Pra ai Masha dang dat let, Shi a Poi Nhtoi hpe mung, December shata (21) ya shani ngu masat shagrau dat ya sai rai nga ai.

Daini Nawku hpung gaw, San Pra ai Wa Jau Peter Canisius a Poi Nhtoi hpe galaw nga ai shaloi, anhte a myit masin hta mung, tinang a makau grup yin, manaw manang ni hpe mai kaja ai hkrun lam de woi sa ya lu ai, jet ai makam masham hpe lu la hkra gam garan ya lu ai ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)