Hkungran Sakramentu Hte Seng Ai Lam

San: (marraige in with other christian with theirs and diviouce by cultural) San: Kahtawlik nawku hpung hku n re sha laga hkrisatan makam hku hkungran lekmat la da ai yan go jinghpaw htung hking hte hkrak rai du salang ni a man e ga di hka mat sai yan go hpang e kahtawlik hpung masha hte bai la na nga yang kahtawlik naw ku htung hku hkung ran sakramentu hpe mai hkam la ai kun? Ya Manje Hpyen Yen Dabang ko shanu shing byi nga ai Theresa Mahkaw Swi Li a ga san hpe htai ya na nngai.

Htai: Hpu nau hkristan hpung ni hta sha n re, kaga makam n bung ai ni rai tim, shanhte a makam hpung a tara hte maren, shing n rai, htunghking, mungdan asuya tara rung ni hta hkungran ta matut da jang n mai hkungran la ai. Kahtawlik Nawku hpung gaw, hpu nau makam hpung ni hte makam n bung ai ni yawng a tara hpe manu shadan ya ai hpe madun ai rai nga ai.

Kahtawlik nawku hpung hta gaw nawku hpung a tara hte maren tara shang hkungran da ai hpe kadai mung jahka ya n lu ai. Dai hkungran ai lam n awng ai sakse ni nga yang mung nawku hpung kawn sha dai hkungran sai lam n awng ai hkungran sakramentu hpe bai shaprai kau ya na ahkaw ahkang nga ai. Mungdan tara agyi ni mung, htunghking salang ni mung n mai jahka ai. Dai zawn galaw ai raitim, Kahtawlik Nawku Hpung hta gaw tara n shang ai.

Hpu nau hpung ni a tara hta gara hku masa nga ai lam mung chye da ra ai. Shanhte a tara hta hkan nna jahka sakse laika ni nga ai rai yang gaw mai hkungran ya ai. Sakse ngu ai shaloi nawku hpung na masat da ai hte shawng de hkungran da na jahka ai wa a myit hkrum sakse laika ga ni lawm ra ai. Si hka rai yang gaw dai lam ni n ra sai.

Kahtawlik num wa shi hkan nang mat ai, hkungran mat ai hpu nau Hkristan Hpung hta jahka ai hte seng nna tara gara hku nga ai rai kun? Shanhte a tara hta htunghking salang ni e jahka ya ai hpe tara shang hkap la ma ai kun? Dai lam ni naw chye ra na re. Grau nna gaw dai shi hkungran ta matut da ai wa hkum nan jahka kau ai rai kun? Myit hkrum nna jahka ai sakse masat masa nga ai kun? Shi hkum nan myit hkrum let jahka ai sakse nga yang gaw Kahtawlik Nawku htung hte hkungran sakramentu mai hkam la na re.

Dai zawn re ai mabyin nga ai rai yang tinang a ginwang up jau ni hte hkrum nna atsin ayang san jahkrup bawng ban la ga.